𝗗𝗜́𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟮𝟰 𝗔𝗴𝗼𝘀𝘁𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, hala’o enkontru ho Reprezentante Permanente Timor-Leste (TL) ba Organizasaun Nasaun Unidas (ONU) iha Nova Iorke, Embaixadór DR. Dionísio da Costa Babo Soares, iha Sala Gabinete Ministru Justisa, Ministériu Justisa, Kolmera, Díli.

Enkontru ne’e sai nu’udar oportunidade importante ba parte rua hodi troka informasaun iha perspetiva kona-bá dinámika no dezenvolvimentu iha arena internasionál, liuliu asuntu sira ne’ebé iha relasaun direta ho interese nasional, prioridade governu no agenda dezenvolvimentu internasional ba setór Justisa Timor-Leste nian.

Iha enkontru ne’e, parte rua mós diskute no aborda assuntos estratéjika sira ne’ebé iha relasaun ba Timor-Leste ba área temátika inklui dezenvolvimentu sustentável, kooperasaun internasionál, paz no seguransa, protesaun no promosaun direitus umanus, no esforsu atu haforsa Estado de Direito, Demokrasia no Direitus Humanus.

Okaziaun referida, nesesáriu kontinua haforsa kooperasaun no koordenasaun entre Estadu parte Timor-Leste no Organizasaun Internasionál ONU, hodi asegura interese no polítika estratéjiku Timor-Leste nian iha forum mundial (multilateral,regional no bilateral).

Ministru Justisa iha nia konversasaun aborda nia hanoin sira ba hametin, prinsípiu Estadu de Direito, respeitu ba direitus umanus no konsolidasaun instituisaun públika ne’ebé forte, transparente no efetivu, sai elementu fundamentál ba konsolidasaun demokrasiá no promosaun dezenvolvimentu sustentável.

Sorumutu ne’e, hatuur komitmentu vice-versa entre Timor-Leste atu kontinua partisipa ho ativu iha agenda internasionál no multilateral, liu husi diplomásia, kooperasaun no diálogu konstrutivu, hodi kontribui ba promosaun paz, estabilidade, justisa no dezenvolvimentu, no asegura benefísiu ba povu Timor-Leste.