𝗗𝗶𝗹𝗶, 𝟮𝟴 𝗔𝗴𝗼𝘀𝘁𝘂 𝟮𝟬𝟮𝟲

Primeiru-Ministru Kay Rala Xanana Gusmão, hamutuk ho Ministru Obras Públikas, Eng.Samuel Marçal no Sekretáriu Estadu Asuntu Toponímia no Organizasaun Urbana - SEATOU, Germano Santa Brites Dias, akompaña husi Prezidente Komisaun Ezekutiva Eletricidade de Timor-Leste, Empresa Públika - EDTL, E.P., Paulo da Silva ho ekipa BIR-MOP, observa direta Panel RMU - Ring Main Unit no Panel LV - Low Voltage sistema underground nian ne'ebé hetan estragus husi ema deskoñesidu iha área Igreja Békora, kinta-feira ne'e.

Iha observasaun ne'e, PM Xanana kondena maka'as aktu vandalizmu ne'ebé komete husi ema deskoñesidu hasoru propriedade eletrisidade nian.

Aktu ne'e inklui sobu odamatan husi Panel RMU no Panel LV nomos uza tinta pilox hodi pinta iha Panel RMU nia lolon.

PM Xanana husu bá autoridade relevante sira atu halo investigasaun lalais hodi identifika autór sira no aplika lei tuir prosedimentu ne'ebé vigora.

Xefe Governu mós husu bá komunidade sira atu kuidadu no proteje hamutuk infraestrutura públika sira, tanba infraestrutura ne'e benefísiu bá povu tomak. Se la kuidadu didi'ak, ema kontinua mai sobu no ikus liu ahi sei lá lakan.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*