Dili, 31 Agostu 2026

Ekipa tékniku husi Diresaun Nasionál Infraestrutura Komunikasaun (DNIC), Ministériu Transportes no Komunikasoen (MTC), reativa koneksaun kabu fibra ótika hodi asegura rede internet ne'ebé sei apoia transmisaun direta Rádio-Televisaun Timor-Leste. E.P. (RTTL.E.P) durante selebrasaun Misa Preladus Bispu Nain Haat iha Altar Tasi Tolu, Dili.

Servisu tékniku ne’e foka liu bá asegura estabilidade no kontinuidade koneksaun liña komunikasaun, liu-liu bá nesessidade transmisaun Direta iha kanal RTTL nomos media sosiál RTTL.EP nia.

Ekipa DNIC-MTC realiza verifikasaun no reativasaun infraestrutura fibra ótika ne’ebé liga bá rede komunikasaun iha área Altar Tasi Tolu. Prosesu ne’e inklui inspeksaun koneksaun, teste sinál no verifikasaun estabilidade rede atu minimiza posibilidade interrupsaun durante transmisãu ao vivo.

Apoiu tékniku ida-ne’e konsidera importante tebes presiza koneksaun intranet ne’ebé lais no apropriada atu garante kualidade transmisaun ne'ebé sei di’ak ho nune'e telespetadór sira rai laran no mós rai liur bele akompaña transmisaun direta liuhusi kanál RTTL.EP.

Liu husi servisu ne’e, DNIC-MTC kontinua fó apoiu bá infraestrutura komunikasaun nasionál no kolabora ho instituisaun relevante sira, inklui RTTL EP, hodi asegura servisu komunikasaun dijitál bele funsiona ho di’ak durante eventu públiku nomos relijiozu importante sira.

Reativasaun fibra ótika iha Altar Tasi Tolu mós hatudu kompromisu ekipa téknika DNIC-MTC nian iha manutensaun no garantia disponibilidade infraestrutura komunikasaun, liuliu bainhira presiza apoiu rede bá transmisãn eventu importante governu nia iha Timor-Leste.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊