𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟬𝟳 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Governu Timor-Leste, liuhosi Ministru Justisa, Dr. Sérgio de Jesus Fernandes da Costa Hornai, hateten, emprezáriu no investidór sira ne’ebé hakarak halo investimentu iha Timor-Leste tenke kumpri hotu-hotu rekezitu legal ne’ebé vigora iha Paíz.

Ministru Justisa hato’o lia hirak ne’e hafoin hala’o reuniaun ho Sua-Eselénsia Primeiru-Ministru Interinu, Vise-Primeiru-Ministru no Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino hamutuk ho delegasaun emprezáriu hamutuk-10 hosi Repúblika Populár Xina, ne’ebé mai Timor-Leste ho interese hodi dezenvolve investimentu iha Timor-Leste.

Ministru Justisa hateten, “Ita hakarak garante katak atividade saida deit ne’ebé hala’o iha Timor-Leste tenke kumpri duni rekizitu legál sira. Laiha razaun atu hala’o atividade ne’ebé kontráriu ho ita-nia lei no ho boas prátika, tantu iha nivel nasional ka internasionál,”.

Iha enkontru ne’e, delegasaun emprezáriu aprezenta sira-nia interese no proposta kona-ba atividade investimentu iha área infraestrutura, turizmu, agrikultura no setor ekonomia sira seluk. Entre empreza sira ne’ebé partisipa mak Kompañia KAIZI, ne’ebé antes ne’e hahú ona atividade iha área Tibar.

Ministru Justisa hateten katak Timor-Leste kontinua nakloke ba investimentu estranjeiru no kooperasaun ho país sira hotu, tanba investimentu responsável bele kontribui ba kresimentu ekonomia no dezenvolvimentu nasional.

Ministru Justisa salienta katak, investimentu hosi rai liur importante ba dezenvolvimentu Timor-Leste, maibé tenke hala’o ho prinsipiu, transparénsia no responsabilidade, ho respeitu ba lei nasional no obrigasaun internasionál ne’ebé Timor-Leste adere ba. Investimentu responsável tenke fó kontribuisaun pozitiva ba ekonomia nasional, inklui liuhosi kriasaun oportunidade empregu no apoiu ba dezenvolvimentu sustentável.

Governu Timor-Leste kontinua komprometidu atu kria ambiente ne’ebé favorável, seguru no atrativu ba investimentu, ho garantia katak atividade ekonomia no negósiu hotu-hotu hala’o tuir kuadru legál no interese nasional.