𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟬𝟰 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, simu formadora nain-rua hosi Portugal, iha sala Gabinete Ministru Justisa, edifísiu Ministériu Justisa, Kolmera, Díli.

Formasaun ne’e foka ba área Direitu Sivil no Direitu Penal, ho objetivu atu hametin koñesimentu, kapasidade téknika no kompeténsia profisionál funsionáriu no profisionál sira ne’ebé hala’o knaar iha área justisa, iha Sentru Formasaun Jurídika no Judisiál (CFJJ sigla portugés).

Iha enkontru ne’e, Ministru Justisa hato’o apresiasaun ba formadora nain-rua hosi Portugal tanba sira-nia disponibilidade atu fahe koñesimentu, esperiénsia no prátika di’ak iha área jurídika. Partilla koñesimentu no esperiénsia ne’e konsidera nu’udar kontribuisaun importante ba dezenvolvimentu kapasidade rekursu umanu no fortalese sistema justisa iha Timor-Leste.

Ministru Justisa mos hateten katak inisiativa formasaun ne’e reflete kooperasaun no relasaun servisu entre Timor-Leste no Portugal, liuliu iha área justisa. Kooperasaun ne’e hetan apoiu hosi Memorandu Entendimentu (MoU) ne’ebé asina ona entre Ministériu Justisa Portugal no Ministériu Justisa Timor-Leste.

Liuhosi programa formasaun hanesan ne’e, Ministériu Justisa sei kontinua hametin kapasidade profisionál no téknika husi nia funsionáriu sira, hodi garante prestasaun servisu justisa ne’ebé efisiente, profisionál no tuir prinsípiu estadu de direitu.

Iha serimónia aprezentasaun formadora na’in-rua hosi Portugál, ne’ebé hala’o iha Ministériu Justisa, hola parte Diretor-Jerál Polítika Justisa, Diretor Nasionál Sentru Formasaun Jurídika no Judisiál, reprezentante sira hosi unidade relevante Ministériu Justisa, no funsionáriu sira seluk.