𝗗𝗶𝗹𝗶, 𝟬𝟮 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Ministru Obras Públikas, Samuel Marçal hala'o enkontru ho Sua Excelénsia Sr. Tan Sri Amran Mohamed Zin, Sekretáriu-Jerál Ministériu Negosiu Estranjeiru Malaysia, iha sala reuniaun Ministériu Obras Públikas, Caicoli, Kuarta-feira ne'e.

Iha enkontru ne'e, Sekretáriu-Jerál Ministériu Negosiu Estranjeiru Malaysia akompaña direta husi Embaixador Malaysia iha Timor-Leste, Fairuz Rozali, nomos husi Jabatan Kerja Raya Malaysia-JKR, Departamentu Obras Públikas Malaysia, Senior Director Dato' Ir.Dr. Balamurugan A/L A. Gopal.

Objetivu husi enkontru ne'e mak hato'o informasaun bá Ministru kona-bá projetu konstrusaun edifísiu foun bá kanselaria no rezidénsia diplomátika Malaysia nian iha Pantai Kelapa.

Iha sorumutu ne'e, ekipa tékniku Ministériu Obras Públikas Malaysia nian husu informasaun kona-bá guia ezekusaun projetu nian, rekezitu legál ne'ebé obrigatóriu, inklui mós husu lista emprezériu lokál ne'ebé rejista ona.

Ekipa ne'ebé akompaña Ministru Obras Públikas iha sorumutu ne'e mai husi reprezentante Sekretaria Estadu Toponímia no Organizasaun Urbana - SEATOU, Xefe Gabinete SEATOU, Décio A.E. da Costa Ribeiro, Xefe Gabinete Ministru Obras Públikas, Cristóvão Fausto Guterres, Prezidente Komisaun Ezekutiva EDTL, E.P., Paulo da Silva, Prezidente Konsellu Administrasaun EDTL, E.P., Marito Ferreira, Koordenadór PMU Bee, Nélson Mesquita, inklui delegasaun husi Diresaun Nasionál Protokolu no Seremoniál husi Ministériu Negosiu Estranjeiru no Kooperasaun.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*