Asuntu : MANORIN SIRA HO ESTADU GRÁVIDA, BEBÉ NURAK TUIR FORMASAUN PREPARATÓRIU BA DOSÉNSIA INTEGRADU Sua Exelénsia Ministra Edukasaun, Dra. Dulce de Jesus Soares, ohin dadeer ne’e hasoru malu ho manorin feto sira ne’ebé enfrenta hela situasaun hanesan, grávida, balu foin tuurahi, balu bebé sei ki’ik. Iha mós sira seluk ne’ebé oras ne’e dadaun moras, maibé bele mai tuir hela formasaun durante semana ida iha INFORDEPE. Nune’e Sua Exelénsia Ministra Edukasaun husu ba sira atu ko’alia sai ba dirijente no formadór sira, bainhira sira sente kolen no moras. Hasoru malu ne’e, Sua Exelénsia Ministra Edukasaun, Dra. Dulce de Jesus Soares, husu ba manorin sira ne’ebé enfrenta hela problema labele tauk no moe hodi hateten sai, maibé tenki fó hatene ba dirijente no formadór sira. “Husu ba funsionáriu sira atu ajuda mós kous troka malu ita-nia profesora nia bebé ne’e, nune’e nia mós bele tuir formasaun ho di’ak, bainhira to’o oras fó susu bebé mak bele mai fó susu. Ita tenki apoiu no ajuda sira bainhira sira presiza ema seluk nia tulun. Kuidadu sira ho didi’ak, tanba liuhusi sira mak bele prodús rekursu sira ho kualidade ba futuru nasaun nian”, dehan S. E. Ministra Edukasaun. Governante ne’e mós husu atu manorin sira ne’e hodi labele tuir “Ordem Unida”, maibe tuir de’it mak matéria ne’ebé fó husi formadór sira, tanba haree ba sira-nia kondisaun ne’ebé la permite, ajuda oferese fatin ida ba sira hodi bele deskansa, bainhira sira sente kolen.
Data Publica : 24 Sep 2025
Descrisaun :
