𝗗í𝗹𝗶, 𝟬𝟰 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲 – Ministériu Komérsiu no Indústria (MCI), liuhusi Koordenadór Gabinete Kooperasaun, Parseria no Reformas (GCPR), Sr. Martins Magno, hala’o enkontru ho reprezentante Embaixada Austrália iha Timor-Leste no ekipa téknika, inklui funsionáriu públiku sénior sira, atu diskute oportunidade no estratéjia atu atrai liután investimentu husi empreza australiana sira ba Timor-Leste.

Enkontru ne’e foka liuliu ba oportunidade atu enkoraja empreza australiana sira atu investe iha setór indústria no agrikultura, konsidera Timor-Leste iha potensiál matéria-prima lokal ne’ebé bele dezenvolve liután liuhusi prosesamentu no transformasaun industriál.

Sr. Martins Magno hateten katak MCI konsidera importante atu esplora oportunidade investimentu iha indústria ne’ebé bele transforma matéria-prima lokal sai produtu ho valor aumentadu. Entre oportunidade sira ne’ebé identifika mak dezenvolvimentu indústria iha área agrikultura, prosesamentu du’ut tasi no produtu peskadu, no mos produsaun ka montagem ekipamentu enerjia renovável, inklui painél solar, ne’ebé bele responde ba nesesidade merkadu nasional no, iha futuru, iha potensial atu hetan asesu ba merkadu internasionál.

Enkontru ho representante Embaixada Austrália ne’e sai parte ida husi esforsu MCI atu hametin kooperasaun ekonomia no parseria investimentu ho reprezentasaun diplomátika no parseiru internasionál sira. Antes ne’e, MCI mós realiza ona koordenasaun ho Embaixada Filipina, no sei kontinua ho enkontru sira ho Embaixada Japaun, Vietname no parseiru sira seluk iha semana sira oin.

𝙈𝙚𝙙𝙞𝙖 𝙈𝘾𝙄

See less