𝟎𝟑 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

==============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay, hala’o enkontru ho Sekretáriu-Jerál Ministériu Negósiu Estranjeiru (MNE) Malázia, Dato’ Seri Amran Mohamed Zin, ne’ebé mós nu’udar Líder ASEAN Senior Officials Meeting (SOM) Malázia nian, iha Gabinete Vise-Primeiru-Ministru, Farol, Díli, Kinta, 03 Setembru 2026.

Enkontru ne’e foka ba hametin kooperasaun bilaterál entre Timor-Leste no Malázia, liu-liu iha preparasaun Timor-Leste nian atu hala’o nia papél lideransa no simu Prezidénsia ASEAN iha tinan 2029.

Iha enkontru ne’e, Malázia reafirma nia apoiu maka’as ba Timor-Leste nia preparasaun ba Prezidénsia ASEAN 2029. Apoiu ne’e inklui inisiativa sira ba dezenvolvimentu kapasidade, formasaun téknika, transferénsia koñesimentu no oportunidade ba vizita estudu ba Malázia, hodi prepara rekursu umanu Timor-Leste nian atu responde ba responsabilidade no nesesidade organizasaun eventu ASEAN sira.

Vise-Primeiru-Ministru mós partilla kona-bá esforsu Governu Timor-Leste nian atu aselera dezenvolvimentu infraestrutura sira, inklui projetu Sentru Konferénsia Internasionál no planu mestre ba dezenvolvimentu tasi-ibun, ne’ebé sei suporta realizasaun enkontru no eventu internasionál sira durante Timor-Leste nia Prezidénsia ASEAN iha 2029.

Enkontru ne’e mós diskute Projetu Dezenvolvimentu Embaixada Foun Malázia nian iha Rua Praia dos Coqueiros, Díli. Projetu ne’e sei dezenvolve iha rai ho luan 6.113 metru kuadradu, ne’ebé Repúblika Demokrátika Timor-Leste oferese ba Governu Malázia.

Governu Malázia planeia atu implementa projetu ne’e ho sistema konstrusaun Industrialised Building System (IBS), hodi aselera prosesu konstrusaun no asegura katak edifísiu Embaixada foun ne’e bele konklui tuir prazu planeadu, antes tinan 2029.

Vizita delegasaun Malázia nian ne’e ho objetivu atu haree no avansa preparasaun téknika ba Projetu Dezenvolvimentu Embaixada Foun Malázia nian, no mós hametin relasaun amizade no kooperasaun entre nasaun rua ne’e.

Enkontru ne’e hanesan kompromisu hamutuk Timor-Leste no Malázia nian atu kontinua hametin kooperasaun bilaterál, dezenvolve kapasidade institusionál no rekursu umanu, no asegura katak Timor-Leste prepara ho di’ak atu hala’o nia responsabilidade nu’udar Prezidente ASEAN iha tinan 2029.

𝐃𝐞𝐥𝐞𝐠𝐚𝐬𝐚𝐮𝐧 𝐌𝐚𝐥á𝐳𝐢𝐚 𝐧𝐞’𝐞𝐛é 𝐩𝐚𝐫𝐭𝐢𝐬𝐢𝐩𝐚 𝐢𝐡𝐚 𝐞𝐧𝐤𝐨𝐧𝐭𝐫𝐮 𝐧𝐞’𝐞 𝐤𝐨𝐦𝐩𝐨𝐬𝐭𝐮 𝐡𝐮𝐬𝐢:

1. S.E. Dato’ Seri Amran Mohamed Zin, Sekretáriu-Jerál, Ministériu Negósiu Estranjeiru Malázia;

2. S.E. Fairuz Rozali, Embaixadór Malázia nian iha Timor-Leste;

3. Dato' Ir. Dr. Balamurugan A. Gopal, Diretór Seniór, Departamentu Obras Públikas Malázia;

4. Sr. Imran Ariff Bin Sulaiman, Arkitetu Seniór, Departamentu Obras Públikas Malázia;

5. Sr. Hoo Yip Soon, Sekretáriu Asistente, Ministériu Negósiu Estranjeiru Malázia; no

6. Sra. Jemimah Ujang, Primeira Sekretária, Embaixada Malázia nian iha Timor-Leste.

See less