𝟎𝟐 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

==============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, simu Delegasaun HIKMA Fellowship husi Iémen iha Gabinete Vise-PM, Farol, Díli, Kuarta, 02 Setembru 2026, iha ne’ebé konklui sira-nia loron daruak husi programa aprendizajen no kompromisu sira iha Timor-Leste.

Iha enkontru ne’e, Vise-Primeiru-Ministru subliña importánsia lideransa nasionál ne’ebé sustentável, instituisaun ne’ebé forte no investimentu ba dezenvolvimentu iha tempu naruk. Vise-PM hateten katak, estabilidade no progresu nasionál presiza vizaun klaru, lideransa responsável no kompromisu kontinua hodi harii instituisaun demokrátiku sira.

Vise-Primeiru-Ministru mós afirma katak, rekonsiliasaun entre Timor-Leste no Indonézia nu’udar desizaun deliberada no orienta ba futuru. Vise-PM hatudu katak, prosesu ne’e bele realiza liuhosi vizaun no lideransa haree ba oin husi Primeiru-Ministru, Kay Rala Xanana Gusmão.

Vise-PM mós esplika oinsá eleisaun kompetitiva, formasaun governu koligasaun, governasaun tuir Konstituisaun no diálogu polítiku kontribui atu Timor-Leste bele jere diferensa polítika sira ho dame, liuhosi mekanizmu no instituisaun demokrátiku sira.

Ko’alia kona-bá prioridade Governu nian, Vise-Primeiru-Ministru trasa esforsu sira iha área dezenvolvimentu infraestrutura, asesu ba finansa, kapasitasaun rekursu umanu no integrasaun Timor-Leste nian iha ASEAN. Vise-PM mós refere ba preparasaun kontinua ba Timor-Leste nia prezidénsia ASEAN, ne’ebé planeadu atu realiza iha tinan 2029.

Iha área ekonomia, Vise-Primeiru-Ministru hatuur estratéjia Governu nian ba diversifikasaun ekonomia liuhosi dezenvolvimentu agrikultura, kafé azul, turizmu azul no aumentu produsaun doméstika. Nia mós espresa Timor-Leste nia interese atu hametin relasaun ho Iémen no nasaun sira iha rejiaun Médiu Oriente, liuhosi komérsiu, investimentu no forma kooperasaun seluk.

Iha parte seluk, delegasaun HIKMA Fellowship husi Iémen subliña katak, preparasaun ba fortalesimentu institusionál, rekonstrusaun no renovasaun ekonomia tenke hahú antes konflitu remata kompletu. Tuir delegasaun, perspetiva ne’e reflete objetivu prinsipál husi programa Bolsa Estudu HIKMA, ne’ebé buka atu investe iha líder emerjente sira no prepara sira atu lidera prosesu tranzisaun no rekonstrusaun iha sira-nia nasaun iha futuru.

Sekretariadu g7+ hato’o nia apresiasaun ba Vise-Primeiru-Ministru tanba simu delegasaun HIKMA Fellowship. Programa viajen aprendizajen delegasaun nian sei kontinua iha Timor-Leste durante semana ida-ne’e, ho objetivu atu hasa’e koñesimentu, fahe esperiénsia no aprende husi esperiénsia Timor-Leste nian iha prosesu konstrusaun dame, fortalesimentu instituisaun no dezenvolvimentu nasionál.

See less