𝟎𝟑 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

==============

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, simu delegasaun investidór no emprezáriu sira hosi Índia, ne’ebé lidera husi Nawab Mir Najaf Ali Khan, iha enkontru kortezia ida ne’ebé hala’o iha Gabinete Vise-PM, Farol, Díli, Kinta, 04 Setembru 2026.

Enkontru ne’e tuir komunikasaun husi Embaixada Repúblika Demokrátika Timor-Leste iha Nova Delhi, Índia, ne’ebé hato’o pedidu hosi Nawab Mir Najaf Ali Khan atu halo vizita kortezia ba Vise-Primeiru-Ministru durante nia vizita ho delegasaun emprezariál ida iha Timor-Leste.

Durante enkontru, parte rua diskute oportunidade investimentu no parseria ba dezenvolvimentu ekonómiku iha Timor-Leste. Delegasaun hosi Índia hatudu sira-nia interese atu esplora oportunidade investimentu no harii parseria ba tempu naruk iha setór barak. Área kooperasaun ne’ebé diskute inklui infraestrutura, mobilidade elétrika, enerjia renovável, biofuels, agriteknolojia, edukasaun, turizmu, ospitalidade, setór saúde no seluk tan.

Nawab Mir Najaf Ali Khan hato’o katak, nia delegasaun emprezariál husi Índia mai Timor-Leste ho objetivu atu buka oportunidade konkretu ba projetu no investimentu, inklui posibilidade atu harii negósiu no empreza konjunta ho parseiru sira iha Timor-Leste.

Iha parte seluk, Vise-Primeiru-Ministru, Dato’ Seri Francisco Kalbuadi Lay, agradese interese no atensaun husi investidór sira hosi Índia ba oportunidade investimentu iha Timor-Leste. Vise-Primeiru-Ministru subliña katak Governu Timor-Leste kontinua fó prioridade ba investimentu produtivu, diversifikasaun ekonomia no dezenvolvimentu setór privadu.

See less