Kuala Lumpur, Malázia, 9 Setembru 2026

Delegasaun Timor-Leste, lideradu husi Ministru Transportes no Komunikasaun, Eng.Miguel Marques Gonçalves Manetelu, akompaña husi Prezidente Autoridade Nasionál Komunikasaun (ANC, I.P.), Flávio Cardoso Neves, partisipa iha Enkontru Meza-Ronda Ministru no Regulador sira (Ministers-Regulators Roundtable Meeting – MRRM 2026), ne’ebé realiza iha Grand Hyatt Kuala Lumpur, Malázia.

Enkontru MRRM 2026 ne’e organiza iha parseria entre Ministériu Komunikasaun no Komisaun Komunikasaun no Multimedia Malázia (MCMC) no lidera husi Ministru Komunikasaun Malázia, YB Dato’ Seri Ahmad Fahmi bin Mohamed Fadzil. Enkontru ne’e halibur ministru, regulador, formulador política, parseiru internasionál sira atu fahe esperiénsia, diskute politika no regulasaun kona-bá seguransa dijitál, responsabilidade plataforma nomos kooperasaun rejionál.

Iha enkontru ne’e, diskusaun foka liu-liu bá seguransa online (online safety), protesaun labarik sira iha mundu dijitál, responsabilidade plataforma média sosiál no kooperasaun regulatória transfronteirisa. Partisipante sira troka esperiénsia kona-bá mekanizmu verifikasaun idade, restrisaun idade bá utilizasaun média sosiál, regulasaun plataforma global no forma atu garante katak utilizadór sira, liuliu labarik nomos jovem sira, bele uza ambiente dijitál ho seguru.

Enkontru ne’e mós fó oportunidade bá membru sira atu diskute responsabilidade plataforma, ezekusaun regulasaun, inklui implementasaun Online Safety Act 2025 iha Malázia no nesesidade atu hametin kooperasaun internasionál nomos rejionál atu responde bá problema dijitál ne’ebé liu fronteira nasionál.

Iha nia intervensaun, Ministru Manetelu subliña katak Timor-Leste apoia esforsu atu hametin seguransa online no dezenvolve ambiente dijitál ne’ebé seguru nomos iha konfiansa. Nia mós hato’o preokupasaun kona-bá difikuldade ne’ebé nasaun ki’ik sira hasoru bainhira presiza halo koordenasaun ho plataforma dijitál globál sira, hanesan Google, Meta, TikTok no plataforma sira seluk, tanba sira seidauk iha reprezentasaun direta iha Timor-Leste.

“Timor-Leste nia dezafiu la’ós deit kona-bá regulasaun ka polítika. Dezafiu boot ida mak oinsá atu halo koordenasaun efetiva ho plataforma globál sira hanesan Google, Meta no TikTok bainhira mosu problema. Timor-Leste bele halo lei no polítika di’ak, maibé implementasaun no ezekusaun presiza kooperasaun ho plataforma sira-ne’e.”dehan Ministru Manetelu.

Ministru Manetelu hateten katak reprezentasaun fizika la’ós nesesariamente tenke iha Timor-Leste, maibé plataforma globál sira bele konsidera atu iha pontu fokál rejionál, inklui liuhusi reprezentasaun ka mekanizmu espesífiku iha Singapura, ne’ebé bele fasilita komunikasaun ho nasaun ki’ik sira iha ASEAN nomos Pasífiku.

“Ita la’ós deit presiza reprezentasaun fizika iha Timor-Leste. Maibé ita presiza pontu fokál ida ne’ebé bele toma konta-bá preokupasaun nasaun ki’ik sira, liuliu iha ASEAN no Pasífiku. Ida-ne’e sei ajuda ita atu halo koordenasaun lalais bainhira mosu problema no asegura katak ita nia sidadaun sira bele uza plataforma dijitál ho seguru.”hateten Ministru Manetelu.

Nia subliña katak Timor-Leste agora iha prosesu transformasaun dijitál aceleradu tanba ne’e, seguransa, konfiansa no responsabilidade plataforma tenke dezenvolve hamutuk ho ekspansaun infraestrutura nomos asesu dijitál.

Pontu prinsipál MRRM 2026

Enkontru Meza-Ronda Ministru no Regulador sira (MRRM 2026) foka bá área prinsipál sira tuir mai :

• Seguransa Online no Protesaun Labarik : Hametin polítika no regulasaun atu asegura ambiente dijitál ne’ebé seguru, inklui mekanizmu verifikasaun idade nomos medida apropriadu bá utilizadór minoridade.

• Responsabilidade Plataforma : Hametin responsabilidade plataforma média sosiál, mekanizmu ezekusaun no kooperasaun entre governu, regulador no plataforma globál sira.

• Kooperasaun Rejionál : Haforsa partilla informasaun, asisténsia entre membru sira no koordenasaun regulatória atu responde bá dezafiu dijitál transfronteirisu.

• Konfiansa Dijitál no AI : Hametin infraestrutura dijitál seguru, cybersecurity, protesaun dadus no governasaun Inteligénsia Artifisiál (AI) iha ASEAN.

Partisipasaun Timor-Leste iha MRRM 2026 reflete kompromisu Governu atu hametin transformasaun dijitál ne’ebé seguru, inkluzivu no iha konfiansa nomos atu kontribui ativamente bá kooperasaun dijitál iha ASEAN nu’udar membru foun husi komunidade rejionál.

https://sdi.gov.tl/ministerio/presrealease/create

Média MTK