Aileu, 07 Setembru 2026 – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho tékniku hosi Ministériu Obras Públikas (MOP) no Prezidente Autoridade Munisípiu Aileu (PAM), Jacinto Ribeiro Dias, hala'o diálogu ho komunidade sira ne’ebé afetadu ba projetu alargamentu estrada iha Munisípiu Aileu. Diálogu ne’e hala'o iha área Sabraka Laran, Postu Administrativu Aileu Vila.

Iha diálogu ne’e, ekipa konjunta ko’alia no esplika kona-ba enkuadramentu tékniku projetu nian, área sira ne’ebé sei afeta direta hosi projetu, prosedimentu kona-ba espropriasaun no propriedade privadu, kailendáriu implementasaun obra, benefísiu no impaktu ba komunidade, inklui dezenvolvimentu urbanizasaun nian.

Iha ninia intervensaun, SEATOU hato’o ba komunidade afetadu sira katak, iha tempu badak, ekipa tékniku hosi Ministeriu Obras Públicas sei tuun ba terrenu hodi halo levantamentu dadus. Área sira ne’ebé sei afeta mak hosi diresaun Tiga Pilar ba Aissirimou, Malere to’o Kabas Fatin, no mós área Merkadu kotuk, alargamentu estrada ho medida luan metru 10 to’o 12.

"Hau husu ba ita Aileu-oan sira, tenke koopera ho ekipa ne'ebé sei mai halo levantamentu. Labele kria fali problema ka ko'alia barak-barak bainhira ekipa mai halo levantamentu. Dezenvolvimentu ne'e halo ba ema hotu, la haree ba kór partidu, no dezenvolvimentu ne'e ba interese koletivu. Tanba ne'e, husu ba ema hotu atu koopera nune'e dezenvolvimentu iha Aileu bele la'o ba oin," tenik SEATOU.

Tuir planu, Governu sei halo lansamentu ba projetu estrada urbana ne'e iha fulan-outubru tinan ne'e.