Aileu, 07 Setembru 2026 – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hamutuk ho Prezidente Institutu Gestaun Ekipamentu no Apoiu Dezenvolvimentu Infraestrutura (IGEADI), Ana Paula da Cruz, no Prezidente Autoridade Munisípiu Aileu (PAM), Jacinto Ribeiro Dias, disemina informasaun no ofisialmente halo lansamentu ba normalizasaun estrada husi Suku Namolesu no Asubilitoho to’o Betulau, iha Postu Administrativu Liquidoe, Munisípiu Aileu.

Iha intervensaun, Sekretáriu Estadu SEATOU hateten katak ninia prezensa ne'e atu reforsa servisu Autoridade Munisípiu Aileu, hodi lori programa Governu Sentrál nian hakbesik liután ba populasaun sira iha área Liquidoe.

SEATOU mós husu ba komunidade afetadu sira atu koopera ho programa normalizasaun estrada ne’e. “Karik kona Ita-boot sira-nia rai, ai-horis sira hanesan kafe, sabraka, no seluk tan, tenke kontribui nune’e normalizasaun estrada ne’e bele lori benefísiu mai ita rasik liliu ba Betulau-oan sira. Se lae, ita sei kontinua hasoru difikuldade atu asesu ba estrada ne’ebé di’ak,” dehan SEATOU.

Iha tempu hanesan, Sekretáriu Estadu SEATOU hamutuk ho Prezidente IGEADI, PAM Aileu no Komandante PNTL Munisípiu Aileu, Superintendente Xefe António da Luz, Administradór Postu Administrativu Liquidoe, Xefe Suku sira inklui mós komunidade sira kontinua tuun ba terrenu hodi halo lansamentu ba normalizasaun estrada iha suku Betulau.