Ministru Prezidénsia Konsellu Ministrus, Agio Pereira, ohin, loron 8 fulan-setembru tinan 2026, iha Palásiu Governu, simu Reprezentante foun Banku Aziátiku ba Dezenvolvimentu (ADB) iha Timor-Leste, Artur Andrysiak, ba enkontru kortezia ida ne’ebé sentra ba prioridade nasionál sira ba dezenvolvimentu no área kooperasaun entre Governu no ADB.

Durante sorumutu ida-ne’e, Ministru Agio Pereira destaka diversifikasaun ekonómika nu’udar ida husi prioridade sira IX Governu Konstitusionál nian no aborda dezafiu sira ne’ebé liga ho integrasaun plena Timor-Leste nian iha ASEAN no preparasaun nasionál atu asume Prezidénsia organizasaun rejionál ne’e iha 2029.

Iha kontestu ne’e, parte sira aborda nesesidade atu asegura konkluzaun pontuál ba obra sira iha Aeroportu Internasionál Prezidente Nicolau Lobato no reforsa kondisaun sira ne’ebé presiza atu simu sorumutu no delegasaun sira ne’ebé previstu durante Prezidénsia ASEAN. Parte sira analiza mós prioridade seluk ba dezenvolvimentu, inklui konektividade no infraestrutura sira, dezenvolvimentu Kosta Súl no Greater Sunrise, edukasaun no formasaun profisionál.

Artur Andrysiak reitera ADB nia disponibilidade atu kontinua apoia prioridade sira Timor-Leste nian, liuhusi asisténsia téknika no finanseira, liuliu iha área infraestrutura no transporte, diversifikasaun ekonómika, edukasaun, saúde no preparasaun ba Prezidénsia ASEAN.

Enkontru ne’e permite mós atu analiza projetu sira ne’ebé lao hela ho apoiu husi ADB, ne’ebé abranje área oioin, inklui rekuperasaun ekonómika, reziliénsia klimátika, infraestrutura no servisu báziku sira, konektividade no diversifikasaun ekonómika.

Ikusliu parte rua manifesta intensaun atu mantein koordenasaun hodi identifika área prioridade sira ba kooperasaun entre Governu no Banku Aziátiku ba Dezenvolvimentu.

*****

[PT]

Link para a notícia completa no Portal do Governo:

https://timor-leste.gov.tl/?p=51379&n=1&lang=pt

*****

[EN]

Link to the full article in the Government Website:

https://timor-leste.gov.tl/?p=51379&n=1&lang=en

See less