𝗗í𝗹𝗶, 𝟬𝟵 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲 – Ministériu Komérsiu no Indústria, liuhosi Koordenadór Gabinete Kooperasaun no Reformas, Sr. Martins Magno, hamutuk ho asesor sira, hala’o enkontru ho Embaixadora Kuba iha Timor-Leste, Sra. Grisel Alina Aldama Innis, iha resintu Embaixada Kuba, Farol, Díli.

Objetivu husi enkontru ne’e fó oportunidade atu diskute perspetiva kooperasaun ekonómika no industriál entre nasaun rua.

Iha diskusaun ne’e, parte rua ko’alia kona-ba possibilidade kooperasaun liuhosi ekstensaun Pacific Cigar, ne’ebé iha interese atu investe iha Timor-Leste, no buka área seluk ne’ebé fó benefísiu ba nasaun.

Alende ne’e, diskusaun mós fó destaque ba projetu fábrika yogurt probiótiku, ne’ebé konsidera ona iha tempu naruk. Projetu ne’e haree hanesan oportunidade boot atu hametin produsaun yogurt artesanal lokál, no tau tan ekstratu probiótiku hodi fó valor adisionál ba produtu Timor-Leste.

Inisiativa sira ne’e hatudu katak Timor-Leste iha potensial atu dezenvolve produtu inovadór, hametin kualidade, no kontribui ba merkadu internasionál. Kooperasaun hanesan ne’e bele mós loke dalan ba projetu seluk iha futuru ne’ebé fó benefísiu mutuál ba parte rua.

Iha tempu badak, Embaixada Kuba no MCI sei asina MoU hanesan base legal atu hametin ba kooperasaun Institusionál.

𝗠é𝗱𝗶𝗮 𝗠𝗖𝗜

See less