𝟎𝟑.𝐒𝐞𝐭𝐞𝐦𝐛𝐫𝐨.𝟐𝟎𝟐𝟔 || Sekretario Estadu Pekuária (SEPE), 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨, 𝐋𝐢𝐜. 𝐒𝐇, 𝐋𝐢𝐜. 𝐃𝐢𝐫. 𝐌𝐃, 𝐌.𝐀𝐏, akompaña husi Diretor Nasionál Pekuária(DNP) 𝐋𝐚𝐭𝐢𝐧𝐨 𝐆.𝐃𝐨𝐬 𝐒𝐚𝐧𝐭𝐨𝐬 𝐂𝐨𝐢𝐛𝐫𝐚,, kontinua hala’o vizita no monitorizasaun ba área ne’ebé iha potensialidade atu dezenvolve atividade pekuária iha Aldeia Miguir, Suku Aidabaleten, Postu Administrativu Atabae, Munisípiu Bobonaro. Vizita ne’e realiza ho objetivu atu haree diretamente kondisaun no disponibilidade fatin ne’ebé sei prepara ba instalasaun pastajen animál no implementasaun sistema paddock.

Iha vizita ne’e, ekipa SEPE ho Diretor Nasionál Pekuária haree no avalia kondisaun área, inklui disponibilidade rai, kondisaun pastu, asesu ba bee, no aspetu sira seluk ne’ebé importante ba manutensaun no dezenvolvimentu animál. Avaliasaun ne’e importante tebes atu asegura katak sistema pastajen ne’ebé sei implementa bele adapta ho kondisaun lokal no responde ba nesesidade komunidade.

Implementasaun sistema paddock sei permite atu área pastajen fahe ba parte ka unidade balun, nune’e bele fasilita kontrolu movimentu animál no jestaun pastu. Sistema ida-ne’e mós bele ajuda komunidade atu uza rai ho efisiénsia, prevene pastu uza liu limite, no fó oportunidade ba pastu atu recupera an antes animál sira fila fali ba área ne’ebá.

Durante observasaun ba fatin refere, ekipa SEPE akompaña husi autoridade lokal, Sr. José Angelino, Xefi Aldeia Miguir. Iha oportunidade ne’e, Xefi Aldeia José Angelino hato’o nia agradeseimentu no apresiasaun ba prezensa membru Governu iha Aldeia Migir, ne’ebé mai diretamente haree no avalia kondisaun fatin ne’ebé sei dezenvolve ba atividade pekuária.

Nia mós hateten katak prezensa Governu iha nivel aldeia importante tebes, tanba hatudu atensaun no kompromisu Governu atu apoia komunidade iha dezenvolvimentu setor pekuária, liuliu liuhusi preparasaun pastajen no implementasaun sistema paddock.

Liuhusi vizita no avaliasaun iha terenu, SEPE sei kontinua halo koordenasaun ho autoridade lokal no komunidade atu determina preparasaun no nesesidade sira molok hahú instalasaun pastajen no implementasaun sistema paddock. Ho apoiu no kolaborasaun entre entidade relevante no komunidade, espera katak área ne’e bele dezenvolve sai fatin pekuária produtivu, organizadu no sustentável, no kontribui ba hadi’a moris no rendimentu komunidade lokal.