𝐃í𝐥𝐢, 𝟏𝟏 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 || Ajénsia United States Grains Building Council (USGBC), iha kolaborasaun ho United States Department of Agriculture (USDA), iha sexta-feira ohin hasoru ho sua Ecxelensia Sekretáriu Estadu Pekuária, 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨 , hodi identifika oportunidade no esplora potensiál kooperasaun ho investidór no empreza sira husi Estados Unidos ne’ebé iha interese atu kontribui ba dezenvolvimentu setór pekuaria hanesan hakiak no produsaun manu iha Timor-Leste.

Diskusaun ne’e fó atensaun ba área estratéjika, inklui produsaun manu no ração animál, ho análiza kona-ba nesesidade konsumu hahan animál, dinamika importasaun no esportasaun, no oportunidade atu dezenvolve kapasidade produsaun lokal. Inisiativa ida-ne’e importante hodi aumenta produtividade, fortalece cadeia valor pekuária no apoia esforsu Governu atu atinji seguransa alimentar no autosufisiénsia nasional.

USGBC no USDA mós avalia oportunidade kona-ba infraestrutura no dezenvolvimentu programa sosiál, inklui posibilidade atu fó konsultoria no apoiu tékniku ba programa School Feed, ho objetivu atu ajuda identifika no hili fonte proteína ne’ebé nutritivu, seguru no apropriadu ba nutrisaun labarik sira.

Enkontru ne’e sai oportunidade importante atu aproxima Timor-Leste ho esperiénsia, teknologia no potensiál investimentu husi Estados Unidos, liu-liu iha área produsaun ração, hakiak manu no dezenvolvimentu infraestrutura. Kooperasaun entre Governu, setor privadu no parseiru internasionál sira sei kontribui ba hasa’e produsaun animal, kria oportunidade ekonomia no fortalece sistema seguransa alimentar nasional.

Ho abordagem ne’e, Timor-Leste kontinua buka parceria estratéjika ne’ebé bele lori investimentu, koñesimentu tékniku no inovasaun atu dezenvolve setór pekuária ne’ebé produtivu, sustentável no orientadu ba autosufisiénsia nasional.