𝐕𝐈𝐐𝐔𝐄𝐐𝐔𝐄, 𝟎𝟏 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 — Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, iha tersa ne’e, reprezenta Ministru Agrikultura, Pekuária, Peskas no Florestas (MAPPF) hodi loke ofisialmente atividade Viqueque Perma Youth Camp, ne’ebé hala’o ho tema “Asaun Lokál ba Konservasaun Bee, Rai no Redusaun Risku Dezastre Naturál.”

Atividade ne'ebé realiza iha Cabaleti, Suku Ossorua, Postu Administrativu Ossu ne’e reune joven sira no parte relevante sira atu hametin koñesimentu, konsiénsia no partisipasaun juventude iha esforsu konservasaun ambiente, liuliu iha jestaun sustentável ba rekursu bee no rai, nune’e mós iha prevensaun no redusaun risku dezastre naturál.

Iha nia intervensaun, Sekretáriu Estadu Peskas, parabeniza PERMATIL (Permakultura Timor-Leste), tanba iha vizaun di’ak, reafirma pozisaun atu aranka ba oin ho neineik, maibé beibeik.

“Ita ko’alia kona-ba konservasaun bee, ne’e mak sentru ba buat hotu, tantu ba ema moris, balada no ai-horis”, nia afirma.

Nia subliña, konservasaun bee no rai, ne’e responsabilidade ema hotu nian, tanba rekursu naturál sira ne’e importante tebes ba moris komunidade, seguransa alimentár, agrikultura no dezenvolvimentu sustentável.

“Asaun lokál tenke hahú hosi komunidade no juventude. Joven sira iha papel importante atu sai ajente mudansa iha protesaun ambiente no dezenvolvimentu sustentável iha sira-nia komunidade,” dehan Dr. Mau-caro.

Nia mós enfatiza katak mudansa klimátika no dezastre naturál bele afeta diretamente komunidade, liuliu komunidade rurál sira. Tanba ne’e, presiza aumenta edukasaun no preparasaun komunidade kona-ba prevensaun risku, konservasaun ekosistema no utilizasaun sustentável rekursu naturál.

Viqueque Perma Youth Camp sai nu’udar espasu ida atu joven sira bele fahe esperiénsia, aprende no dezenvolve inisiativa lokál ne’ebé bele kontribui ba protesaun bee, rai no ambiente, no mós hametin reziliénsia komunidade hasoru risku dezastre naturál.

Sekretáriu Estadu Peskas, iha oportunidade ne’e, hato’o apresiasaun ba organizadór no partisipante sira hotu ne’ebé envolve iha atividade ne’e, no enkoraja juventude atu kontinua halo asaun konkretu iha komunidade.

“Juventude mak futuru nasaun, maibé mós juventude mak forsa importante iha presente atu proteje ita-nia ambiente no rekursu naturál ba jerasaun sira tuirmai,” nia hakotu.

Partisipa iha atividade ne’e, Autoridade Lokál, juventude sira hosi Munisípiu Viqueque, Covalima, Ermera, Baucau, Lautem no Munisípiu sira seluk, nune’e mós hetan seguransa másimu hosi PNTL no F-FDTL.