𝐃í𝐥𝐢, 𝟖 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Ministériu Finansas liuhusi Autoridade Tributária (AT) realiza Reuniaun Jeral ho partisipasaun funsionáriu sira hotu, ho objetivu prinsipal rua, mak atu halo avaliasaun kona-ba atinjimentu rekolla reseitas no fó apresiasaun no agradesimentu ba jestór sira ne’ebé remata ona sira-nia mandatu.

Reuniaun ne’e mós sai nu’udar momentu importante atu fó orientasaun ba jestór foun sira ne’ebé asume kargu xefia iha Autoridade Tributária, inklui jestór sira ne’ebé hetan estensaun funsaun atu kontinua sira-nia responsabilidade.

Ho tema “Avaliasaun Servisu no Fó Apresiasaun no Agradesimentu ba Jestór Sesante sira, inklui Orientasaun Servisu ba Jestór Foun sira ne’ebé Asume Kargu Xefia iha Autoridade Tributária,” atividade ne’e fó oportunidade ba lideransa no funsionáriu AT atu haree fila-fali rezultadu servisu no kontribuisaun sira iha períodu anterior.

Iha reuniaun ne’e, Komisáriu Autoridade Tributária, Sr. Nicodemus dos Reis Pereira, hato’o nia apresiasaun no agradesimentu ba jestór sesante sira ba sira-nia prestasaun no kontribuisaun durante assume sira-nia mandatu. Nia subliña katak servisu ne’ebé ezekuta iha Diresaun Nasionál, Unidade, Repartisaun Munisípiu, Departamentu no Seksaun sira, kontribui ba implementasaun atividade, programa no planu Autoridade Tributária nian.

Komisáriu mós parabeniza funsionáriu no jestór sira ne’ebé hetan nomeasaun foun ba kargu xefia no sira ne’ebé hetan mudansa ba unidade ka fatin servisu foun. Iha tempu hanesan, nia fó parabens mós ba jestór sira ne’ebé hetan estensaun funsaun atu kontinua hala’o sira-nia responsabilidade.

Iha nia diskursu, Komisáriu Nicodemus dos Reis Pereira hateten katak reuniaun jeral ne’e realiza tanba koinside ho planu Autoridade Tributária atu hala’o rotasaun ba parte husi kargu xefia.

“Ita nia reuniaun jeral ida-ne’e realiza tanba koinside ho ita nia planu halo rotasaun ba kargu xefia balu ne’ebé hetan mudansa husi diresaun ida ba diresaun seluk, kargu xefia balu ne’ebé hetan cessa, no kargu xefia balu ne’ebé hetan nomeasaun foun, inklui mós kargu xefia balu ne’ebé kontinua hetan estensaun bazeia ba Desizaun husi Presidente KFP Nú. 308/2026,” nia hateten.

Komisáriu enfatiza katak nomeasaun ba kargu xefia tenke simu ho responsabilidade boot no kompromisu atu sai servidor públiku ne’ebé kumpre prinsípiu no dever jerál Funsaun Públika.

Nia hateten katak jestór sira tenke sai ezemplu iha suporta no implementasaun programa no atividade Governu nian, tuir responsabilidade ne’ebé atribui ba kada Diresaun, Unidade, Repartisaun, Departamentu no Seksaun.

“Nomeasaun ba kargu foun no fatin foun labele sente hanesan orgullu ida, maibé tenke sente katak ida-ne’e responsabilidade boot ida atu kontribui ba misaun nobre Autoridade Tributária nian, liu-liu iha administrasaun no rekolla reseitas impostu doméstiku ba Estadu Timor-Leste,” nia enfatiza.

Ba jestór sira ne’ebé hetan estensaun funsaun, Komisáriu husu atu kontinua mantein dezempeñu servisu ne’ebé di’ak no kontinua buka dalan atu hadi’a no mellora kualidade servisu.

Reuniaun Jeral ne’e mós sai nu’udar plataforma atu hametin kooperasaun, responsabilidade no kompromisu entre jestór no funsionáriu sira, hodi asegura katak Autoridade Tributária kontinua hala’o nia misaun ho efetivu iha Administrasaun Tributária no mobilizasaun reseitas doméstikas ba dezenvolvimentu Estadu Timor-Leste.