Dili, 08 Setembru 2026 – Sua Excelência Sekretária Estadu ba Igualdade (SEI), Sra. Elvina Sousa Carvalho, simu vizita ofisiál no kortezia husi Diretór Foun Misaun Rezidente Banku Dezenvolvimentu Aziátiku (ADB) iha Timor-Leste, Sr. Atur Andrysiak, iha edifísiu SEI, Caicoli, Dili.

Vizita ne’e ho objetivu atu hametin liután parseria ne’ebé eziste ona entre SEI no ADB, no diskute kolaborasaun ne’ebé la’o hela no potensiál kooperasaun foun iha área igualdade jéneru no empoderamentu feto iha Timor-Leste.

Marka prezensa iha enkontru ne’e, S.E. Sekretária Estadu akompaña husi Diretora Nasionál Relasaun Públika no Media-SEI, Sra. Maria Filomena Babo Martins, hamutuk ho ekipa téknika husi Misaun Rezidente ADB Timor-Leste.

Iha biban ne’e, S.E. Sekretária Estadu hato’o bem-vindu no parabéns ba knaar foun ne’ebé Diretór assume iha Timor-Leste, no hato’o agradesimentu ba kontribuisaun boot ADB nian ba dezenvolvimentu Timor-Leste, liuliu iha promosaun igualdade jéneru no empoderamentu feto iha ekonomia.

S.E. Sekretária subliña katak parseria SEI ho ADB sai estratéjiku tebes, tanba ADB la'ós de'it parseiru dezenvolvimentu, maibé parseiru estratéjiku. Hamutuk, SEI no ADB dezenvolve ona Country Gender Assessment nu’udar matadalan ba polítika nasionál, no apoia implementasaun Planu Asaun Nasionál Kontra Violénsia Bazeia ba Jéneru (PAN-VBJ 2022-2032) liuhusi projetu Together for Equality.

Iha enkontru ne’e mós, S.E. Sekretária Estadu informa kona-ba programa prioridade IX Governu Konstitusionál liuhusi SEI, hanesan implementasaun faze datoluk PAN-VBJ nian, empoderamentu ekonómiku feto, no hasa’e partisipasaun feto iha prosesu desentralizasaun no lideransa, tanba iha tinan 2027 Timor-Leste sei realiza Festa Demokrasia liuhusi eleisaun ba Autoridade no Asembleia Munisipál.

Aleinde ne’e, S.E. Sekretária Estadu esplika katak iha tinan ne’e Timor-Leste sei selebra Loron Nasionál Feto ba dala-50 hodi hanoin hikas luta eróina sira nian, liuliu eróina Maria Tapo. Tanba ne’e, S.E. Sekretária Estadu konvida ofisialmente Diretór Foun ADB atu partisipa iha eventu importante ne’e.

Iha fatin hanesan, Diretór Foun Misaun Rezidente ADB hato’o agradesimentu ba simu-malu ne’ebé di’ak husi SEI no reafirma kompromisu ADB nian, tuir Estratéjia 2030, ne’ebé tau igualdade jéneru nu’udar prioridade operasionál aas, hodi servisu hamutuk ho SEI nu’udar parseiru estratéjiku Governu nian atu tradús prioridade igualdade jéneru nasionál ba rezultadu mensurável iha nivel institusionál, munisipál no komunitáriu.

Área xave sira ne’ebé diskute iha sorumutuk ne’e mak; Hametin empoderamentu ekonómiku feto no apoiu ba grupu no asosiasaun feto sira, liuhusi Programa Fundu Transferénsia Públiku ba Empoderamentu Ekonómiku Feto; Sustenta kolaborasaun iha lideransa feto liuhusi Programa Lider Feto Ázia; Hadi'a abordajen responsiva ba jéneru iha programa sira ne’ebé apoia husi ADB iha área infraestrutura, reziliénsia klimátika, subsisténsia rurál, bee no saneamentu, saúde no edukasaun vokasionál; Esplora utilizasaun perfil jéneru munisipál husi SEI hodi informa dezenhu no implementasaun projetu iha futuru; Koordena atividade iha futuru, inklui planu komemorasaun Loron Nasionál Feto iha Novembru 2026.

Ikus liu, parte rua rekoñese importánsia kontinuasaun parseria hodi asegura katak feto no labarik-feto sira hetan benefísiu signifikativu husi programa dezenvolvimentu sira no igualdade jéneru nafatin sai sentrál ba dezenvolvimentu inkluzivu no sustentável iha Timor-Leste.