Dili, 15-09-2026 – Sekretaria Estadu ba Igualdade (SEI) iha loron 15 fulan-Setembru tinan 2026, realiza enkontru hamutuk ho parseiru internasionál sira iha Salaun Maria Goreti - SEI, Caicoli, Dili.

Enkontru ne'e prezide husi Diretór-Jerál SEI, Sr. Armando da Costa, no akompaña husi Inspetora no Auditoria, Sra. Benigna Maria Amaral. Partisipa mós Diretór-Diretora, Xefe Departamentu no Funsionáriu SEI tomak no hamutuk ho Parseiru sira mak hanesan UNICEF, WFP, WHO, World Vision Timor-Leste (WVTL), ADB, PROSIVU, Plan International Timor-Leste, UNDP no UNRCO.

Objetivu husi enkontru ne'e mak atu halibur hanoin no ideia sira, no husu apoiu husi parseiru sira ba preparasaun Loron Nasionál Feto nian ne'ebé sei monu iha loron 3 Novembru 2026.

Tanba tinan ida-ne'e nu'udar tinan espesial, SEI sei selebra Tinan Jubileu ba da-50 Loron Nasionál Feto Timor-Leste ho:

Tema Ofisial: "Feto Timor-Leste: Hodi Selebra Tinan 50 Igualdade no Inkluzaun"

Lema Ofisial: "Ami, Feto Timoroan sira sei nunka rende, ami sei luta nafatin hodi hetan Igualdade no Inkluzaun"

Komemorasaun ne'e ho objetivu atu fó onra no rekoñese kontribuisaun istóriku husi feto timoroan sira, reforsa kompromisu ba igualdade jéneru no inkluzaun sosiál, no promove partisipasaun ativa feto sira-nian iha dezenvolvimentu nasionál. Programa ne'e mós atu fó omenajen ba jerasaun feto sira ne'ebé durante tinan 50 nia laran kontribui ona ba independénsia, pás no dezenvolvimentu Timor-Leste nian.

Tuir planu, programa ofisial sei hahú iha loron 3 fulan-Novembru tinan 2026 iha Munisípiu Bobonaro, hodi fó omenajen ba Eroína Nasionál Maria Tapó, ho atividade kulturál no desportiva, misa agradesimentu no diálogu komunitáriu.

Enkuantu serimónia ofisial nasionál sei hala'o iha loron 6 fulan-Novembru iha Centro de Convenções de Dili (CCD), ne'ebé sei inklui semináriu kona-ba feto sira-nia knaar hodi harii dame, igualdade no dezenvolvimentu, espozisaun kona-ba feto sira-nia kontribuisaun ba rezisténsia nasionál no konstrusaun Estadu, no atividade kulturál no artístika. Prevê mós atividade komemorativa iha munisípiu sira hotu