𝗗Í𝗟𝗜, 𝗠𝗝 — 𝗞𝘂𝗮𝗿𝘁𝗮-𝗳𝗲𝗶𝗿𝗮, 𝟬𝟵 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, lidera diskusaun kona-bá prosesu preparasaun ba XIX Konferénsia dos Ministros da Justiça dos Países de Língua Oficial Portuguesa (XIX CMJPLOP sigla portugés), ne’ebé sei realiza iha loron 26 no 27 Fulan Outubru tinan 2026, iha Díli, Timor-Leste.

XIX CMJPLOP reprezenta eventu internasionál importante ba Ministériu Justisa no Timor-Leste, konsidera katak Timor-Leste sei sai país anfitriaun ba enkontru ne’ebé sei reúnir Ministru sira no reprezentante sira iha nivel aas hosi Ministériu Justisa husi nasaun sira ne’ebé uza Língua Portugés nu’udar língua ofisiál.

Iha prosesu preparasaun ne’e, Ministru Justisa orienta entidade no unidade relevante sira iha Ministériu Justisa atu asegura katak aspetu tékniku, substansivu, lojístiku, protokolár no organizasionál hotu-hotu prepara ho kuidadu no tuir padraun ne’ebé presiza, hodi garante konferénsia bele hala’o ho susesu, profesionalizmu no dignidade.

Konferénsia ne’e sei sai mós nu’udar oportunidade estratéjika ba Timor-Leste atu partilla esperiénsia, boas prátika no politika públika iha área justisa, no hametin tan kooperasaun jurídika no judisiária entre Estadu membru Comunidade dos Países de Língua Portuguesa (CPLP sigla portugés).

Atu garante konferénsia ne’e la’o ho di’ak, presiza iha koordenasaun no kolaborasaun forte entre Ministériu Justisa, Gabinete Primeiru-Ministru, instituisaun relevante sira no parseiru sira seluk.

Koordenasaun ne’e importante atu asegura katak organizasaun XIX CMJPLOP reflete kapasidade institusionál Timor-Leste no, iha tempu hanesan, kontribui ba hametin relasaun, solidariedade no kooperasaun entre nasaun sira ne’ebé fahe patrimóniu linguístiku no jurídiku komún.

Konferénsia ida-ne’e, iha Díli sei sai oportunidade importante ba Timor-Leste atu hatudu nia kompromisu no kontribuisaun ba kooperasaun internasionál iha área justisa, no mós atu hametin pozisaun Timor-Leste iha espasu kooperasaun entre nasaun sira ne’ebé uza Língua Portugés.

Ministériu Justisa konsidera konferénsia ne’e konsidera hanesan oportunidade estratéjika ba Timor-Leste atu hatudu nia kompromisu iha promosaun Estado de Direito, fortalese sistema justisa no dezenvolve kooperasaun internasionál iha área jurídika no judisiária.