𝗗Í𝗟𝗜, 𝗠𝗝—𝗧𝗲𝗿𝘀𝗮-𝗳𝗲𝗶𝗿𝗮 𝟬𝟴 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Governu, liuhosi Ministériu Justisa serbisu hamutuk ho Ministériu Negósius Estranjeirus no Kooperasaun, ba dala uluk, asegura ona prestasaun direta servisus renovasaun pasaportes nian ba komunidade timoroan ne’ebé hela no serbisu iha Israel, atu evita timoroan sira ne’e la presiza dezloka ba país sira seluk hodi renova sira-nia dokumentus viajen nian.

Inisiativa ne’e ho objetivu atu responde ba difikuldade kona-ba asesu servisus dokumentasaun ofisiál ne’ebé komunidade timoroan iha Israel enfrenta, iha kontestu ida ne’ebé Timor-Leste la iha reprezentasaun diplomátika ne’ebé hela iha país ne’ebá.

Prosesu ne’e hala’o hosi Ministériu Justisa, ne’ebé lidera hosi Ministru Sérgio de Jesus Fernandes da Costa Hornai, serbisu hamutuk ho Ministériu Negósius Estranjeirus no Kooperasaun no apoiu hosi Adidu Ministériu Justisa nian ne’ebé destaka iha Reinu Unidu. Esforsu ne’e konta mós ho kolaborasaun husi servisus Rejistus no Notariadu, servisus konsulares, no mós reprezentasoins diplomátikas Timor-Leste nian iha Londres no Abu Dhabi.

Dezlokasaun ekipa ne’e permite hala’o prosedimentu lokál ne’ebé presiza ba renovasaun pasaporte, hodi fasilita asesu sidadaun sira-nian ba servisus públikus no hamenus todan no difikuldades ne’ebé relasiona ho nesesidade viajen nian ba país seluk hodi trata dokumentu sira ne’e.

Komunidade timoroan iha Israel agradese ba Governu Konstitusionál da-9 ne’ebé responde ba situasaun ne’e no destaka impaktu hosi inisiativa ne’e ba kontinuidade hosi sira-nia atividade profisionál no apoiu ba ida-idak nia família iha Timor-Leste.

“Apoiu ida-ne’e importante tebetebes mai ami, tanba permite ami atu kontinua serbisu iha Israel, ho nune’e, kontinua fó apoiu ba ami-nia família sira iha Timor-Leste”, dehan membru komunidade ida.

Sidadaun sira ne’ebé halo parte, hato’o mós sira-nia rekoñesimentu ba faktu katak servisu ne’e disponibiliza diretamente iha Israel ba dala uluk. “Ami agradese tebetebes ba esforsu no apoiu ne’ebé Governu halo mai ami, hodi realiza ba dala uluk renovasaun ba pasaporte iha Israel”, sira dehan.

Ministru Justisa reafirma katak prestasaun servisus ne’e nu’udar parte ida hosi responsabilidade Estadu nian hodi garante sidadaun timoroan sira asesu ba servisus públikus dokumentasaun nian tantu iha territóriu nasionál nune’e mós iha rai-li’ur.

Realiza atividade ida-ne’e permite responde nesesidade ida ne’ebé konkreta ba komunidade timoroan iha Israel no asegura asesu lokál ba renovasaun ida-idak nia dokumentus viajen nian.