Díli, loron 21 fulan-setembru 2026 — Sekretaria Estadu ba Igualdade (SEI), liuhusi Sekretariadu Komisaun Organizadora ba Komemorasaun Loron Nasionál Feto Timor-Leste dala 50, hala’o sorumutu ho delegasaun husi Organização Popular de Mulheres de Timor (OPMT), hodi halo konsultasaun no hametin koordenasaun ba preparasaun komemorasaun Loron Nasionál Feto Timor-Leste dala 50. Sorumutu ne’e hala’o iha Salaun Enkontru Edifísiu SEI, Caicoli.

Sorumutu ne’e lidera husi Inspetora no Auditoria,Sra. Benigna Maria Amaral,nudar Koordenadora Sekretariadu Komisaun Organizadora, akompaña husi Xefe-Departamentu Relasaun Públika no Parseiru Dezenvolvimentu (Vice II Sekretariadu Komisaun Organizadora), Sr. Hermínio Xavier, no Sr. Marino Mouzinho, ho asisténsia téknika husi Sra. Tarcizia Maria de Sousa Gama.

Delegasaun OPMT kompostu husi Sra. Filomena de Alves (Sekretária-Jerál Adjunta-OPMT), Sra. Judit Dias Ximenes (Sekretária-Jerál Adjunta-OPMT), Sra. Josefina Moniz (antiga membru-OPMT), Sra. Aicha Bassarewan (antiga membru-OPMT), Sra. Maria de Fátima Vaz (antiga membru-OPMT).

Enkontru ne’e sai nu’udar espasu konsultasaun entre SEI no reprezentante OPMT kona-ba preparasaun Komemorasaun Loron Nasionál Feto Timor-Leste dala 50. Aléide ne’e, sorumutu mós fó oportunidade atu rekoñese no dokumenta kontribuisaun OPMT no feto Timor-Leste durante tinan 50, partilla memória no esperiénsia, no diskute prioridade no espetasaun feto sira ba futuru.

Iha enkontru ne’e, SEI husu apoiu no kolaborasaun husi OPMT atu kontribui iha prosesu peskiza no dokumentasaun kona-ba istória Eroina Maria Tapó, liuliu kona-ba ninia kontribuisaun no partisipasaun iha luta armada iha tinan 1975. Inisiativa ne’e iha objetivu atu preserva memória no patrimóniu istóriku kona-ba feto sira ne’ebé fó kontribuisaun iha luta no konstrusaun nasaun Timor-Leste.

OPMT, ho nia esperiénsia no memória institusional kona-ba movimentu feto, espera bele kontribui ho informasaun, dokumentu, testemuña no fonte relevante sira hodi apoia prosesu peskiza no dokumentasaun kona-ba Eroina Maria Tapó. Informasaun sira ne’e sei halibur, verifika no organiza atu ajuda rekonstitui no dokumenta ho di’ak liután ninia istória no kontribuisaun.

Husi sorumutu ne’e, SEI no OPMT konkorda no reafirma komitmentu atu kolabora hamutuk iha halibur no partilla informasaun relevante kona-ba Eroina Maria Tapó. Kolaborasaun ne’e mos sei kontribui ba esforsu atu valoriza no preserva memória feto Timor-Leste, liuliu iha kontestu Komemorasaun Loron Nasionál Feto dala 50.

Através husi kolaborasaun ne’e, SEI no OPMT sei kontinua hametin koordenasaun no servisu hamutuk hodi asegura katak komemorasaun dala 50 bele reflete istória, kontribuisaun, realizasaun no aspirasaun feto Timor-Leste iha prosesu konstrusaun nasaun no ba futuru.