DÍLI, 19 Setembru 2026 — Sekretaria Estadu Kooperativas (SEKoop) kontinua halo koordenasaun ho instituisaun relevante sira atu asegura preparasaun ba realizasaun Díli Regional Cooperative Conference and Ministerial Dialogue (DRCCMD) no ASEAN Cooperative Expo 2026.

Iha kontestu preparasaun ba eventu internasionál rua ne’e, Sekretáriu Estadu Kooperativas, Eng. Arsénio Pereira da Silva, M.Agr., hala’o reuniaun koordenasaun ho Vise-Primeiru-Ministru Koordenador Asuntus Ekonómikus, Ministru Turizmu no Ambiente, Francisco Kalbuady Lay, iha Gabinete VPM, Farol, Díli.

Reuniaun ne’e foka ba aprezentasaun atualizasaun kona-ba progresu preparasaun no koordenasaun interinstitusionál ne’ebé presiza atu garante realizasaun eventu sira ne’e lao tuir planeamentu.

Iha reuniaun, Sekretáriu Estadu Kooperativas akompaña husi Even Organizer no Prezidenti Komisaun Atual/Diretór-Jerál, Eng. Olderico Lopes; Xefe Gabinete, Francisca L. de Araújo Simith; asesór sira, Leovogildo Belarmino no Jacinto Moreira; Diretór Nasionál Dezenvolvimentu Kooperativas, Gil Bento; no Diretora Nasionál Aprovisionamentu no Lojístika, Zélia de Carvalho.

DRCCMD no ASEAN Cooperative Expo 2026 sei sai parte husi esforsu atu hametin kooperasaun iha área kooperativas no fó espasu ba partilla esperiénsia, interkambiu no dezenvolvimentu setor kooperativas iha nivel rejionál.

SEKoop, liuhosi koordenasaun ho parte relevante sira, kontinua prepara aspetu tékniku, organizasionál no lojístiku atu suporta susesu eventu sira ne’e.

#Média SEKoop#

See less