𝐅𝐚𝐭𝐮𝐥𝐮𝐥𝐢𝐤, 𝟏𝟖 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔

Sekretáriu Estadu Dezenvolvimentu Lokál (SEDL), Mateus W. dos Santos Tallo, akompaña husi Prezidente Autoridade Munisípiu Covalima, Miguel Armada Cardoso, hamutuk ho estrutura Autoridade Munisípiu, hala’o Vizita Trabalhu no diálogu ho komunidade iha Postu Administrativu Fatululik, Munisípiu Covalima.

Vizita ne’e ho objetivu atu hakbesik Governu ba povu, rona diretamente nesesidade no preokupasaun komunidade, no identifika prioridade sira ba dezenvolvimentu lokal.

Iha diálogu ne’e, SEDL subliña katak dezenvolvimentu lokal labele konsentra de’it iha Suai, maibé tenki to’o mós ba postu administrativu no suku sira iha Munisípiu Covalima.

“Dezenvolvimentu lokal labele lao de’it iha Suai. Tenki mai mós iha Fatululik, Tilomar, Fohorem, Zumalai no Maucatar atu rona diretamente povu nia nesesidade,” dehan Mateus.

Komunidade Fatululik, iha oportunidade ne’e, hato’o sira-nia preokupasaun kona-ba infraestrutura bázika, liu-liu estrada, bee moos no eletrisidade, ne’ebé konsidera importante ba melhoria kondisaun moris no atividade ekonomia.

SEDL mós enfatiza importância partisipasaun komunidade iha identifikasaun nesesidade, planeamentu no implementasaun programa dezenvolvimentu, inklui liu husi Programa Dezenvolvimentu Nasional Suku (PNDS).

“Ha’u mai la’ós atu hanorin, maibé atu rona. Ha’u husu ba ita hotu atu partisipa ativu. Keta tauk atu ko’alia sai saida mak di’ak no saida mak la di’ak. Governu mai atu servi, la’ós atu manda,” dehan nia.

Iha sorin seluk, Autoridade Munisípiu Covalima aprezenta progresu servisu no planeamentu ba tinan 2027, inklui Planu Asaun Annual (PAA) 2027 no Planu Investimentu Infraestrutura.

Atividade ne’e mós inklui distribuisaun nesesidade bázika ba família sira ne’ebé identifika presiza no disseminasaun informasaun husi Komisaun Nasionál Eleisaun (CNE)kona-ba eleisaun munisipál no poder lokal.

SEDL afirma katak vizita ba postu administrativu no suku sira sei kontinua nu’udar parte husi esforsu atu asegura servisu Governu hakbesik ba komunidade no dezenvolvimentu lokal responde ba nesesidade povu.

Media SEDL

See less