Dili, 15 Setembru 2026

Ministru Transportes no Komunikasaun, Eng.Miguel Marques Gonçalves Manetelu tersa ne’e sai sasin bá iha serimónia termu entrega graduadu nain sanulu resin lima ne’ebé remata ona sira nia estudu iha indonézia bá iha Vogál I Diresaun Servisu Aeroportuáriu (DSA) no Vogál II Servisu Trafego Aéreo Navegação (STAN).

Termu entrega ne’e hala’o iha edifísiu ANATL Komoro Dili, objetivu husi serimónia ne’e atu asegura prosesu administrativu, graduadu Timoroan na’in sanulu resin lima (15) kompostu husi na’in sanulu resin tolu (13) nu’udar bolseirus ANATL FDCH, iha Nível Diploma III (D3) na’in sanulu (10) no na’in tolu (3) kontinuasaun bá Nível Diploma IV (D4) husi Air Traffic Controller (ATC), na’in rua (2) seluk fasilita husi ANATL bá Nível Diploma III (D3), maibe finansia selu rasik husi familia inan aman, hodi bá hala’o ona estudu durante tinan tolu (3) no remata ona sira nia estudu, simu ona graduasaun iha fulan kotuk, iha Sekolah Politéknik Penerbangan Indonesia Curug, Surabaya nomos Palembang bá área espesífiku aeroportu nian.

ANATL Implementa Programa Bolsu Estudu bá dezenvolvimentu rekursu umanu no formasaun profesionál iha área aviasaun sivíl inklui formasaun iha nivél diploma III no diploma IV, estudante sira ne’e remata ona sira nia estudu iha akademia aviasaun sivíl iha Indonézia. Programa bolsu estudu bazeia bá kontratu estudu no termu kompromisiu ne’ebé selebra entre ANATL, FDCH, bolseiru no inan aman.

Reprezenta Graduadu Isabel Fátima de Jesus hateten atu hetan susesu persiza sakrifisiu ne’ebé boot hodi atinji metas no objetivu.

“laiha dalan bá susesu ida maka fasil, buat hotu persiza sakrifisiu oi-oin hodi ita bele manan to’o iha pontu susesu, jornada estudu ne’ebé ami ultrapassa no simu graduasaun iha fulan agostu tinan 2026 sai hanesan momentu siknifikativu bá ami nia vitoria husi ami nia sakrifisiu rasik, husi esforsu sira ne’e hotu sai hanesan esperensia ida mai ami, hodi ami aprende liutan kona-bá responsabilidade disiplina no forma ami nia karater privadu husi loron bá loron nia atu sai ema ne’ebé di’ak no obidiente, kreativu no sai privadu ne’ebé mka bele iha benefísiu iha enviromentu ne'ebé mak ami hamahan an bá” dehan bolseiru Isabel Fátima de Jesus.

Diretór FDCH, Julio Aparicio subliña katak ema (kapitál umanu) mak sai xave no fundasaun prinsipál bá dezenvolvimentu. Se lá kria rekursu umanus ne'ebé kualifikadu, matenek no ijijente, dezenvolvimentu fíziku ne'ebé ho folin karu no boot sei lá lori benefísiu ne'ebé maximu bá sosiedade no nasaun.

"Dezenvolvimentu labele hahú husi sasan maibé dezenvolviementu tenke hahú husi ema tanba ema mak hun no abut bá riku soin hotu-hotu kuandu ema lá matenek o nia programa bele di’ak bele to’o iha ne’ebé. Lalehan nunka bele hetan tanba ita nia rekursu umanus laiha tanba ne’e bainhira ha’u tama iha FDCH iha prinsipiu ida tanba ha'u hatene katak ita nia rekursu umanus iha timor sei menus tebes tanba ne’e persiza halo kapasitasaun bá ita nia ema sira''' subliña Julio Aparicio

Ministru Manetelu liuhusi okaziaun husu bá graduadu sira atu hatudu disiplina no aplika siensia sira ne'ebé hetan husi universidade hodi mai dezenvolve Timor-Leste liuhusi setór aviasaun sivíl.

"Ita tenke fó onra bá martires da pátria sira tanba sira nia mate mak ita bele tur iha ambiente ida hanesan ohin kalan, sira nia luta husik hela bá ita rai ida naran timor leste ne’ebé mak sai ita nia responsabilidade oinsá mak atu dezenvolve rai ida ne’e ho povu sira para atu bele moris di’ak ida ne’e ita nia responsabilidade tanba ne’e mak iha imi nia kabaas koñesimentu sira ne’ebé imi hetan, siensia ne’ebé imi aprende imi tenke aplika ho responsabilidade, disiplina no integridade. Ita bele matenek maibé laiha integridade ita laiha valór, imi nia disiplina tenke hadaet bá timor oan sira ne’ebé maka lahetan oportunidade bá eskola hanesan imi" hateten Ministru Manetelu.

Ministru Manetelu Sente onradu Lori governu da sia nia naran hato'o apresisaun no parabéns bá graduadu sira nomos inan aman sira tantu ANATL, E.P nomos FDCH.

Governante ne'e enfatiza katak susesu lá mai ho buat fasil. Graduasaun la’os faze ikus maibé hahú husi jornada foun iha karreira no moris. Tenke orgullu no agradese bá Maromak, família no ema hotu ne’ebé fó apoiu nomos ohin loron graduadu sira bele fila mai atu kontribui bá dezenvolvimentu Timor-Leste, liuliu iha setór aviasaun sivil.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊