Dili, 17 Setembru 2026

Parlamentu Nasionál kinta ne'e marka audiensia ho liña ministerias sira kona-bá proposta lei No. 29/VI (3.4) Rejime Jerál Taxa Administrativa nian hodi rona opiniaun no halo diskusaun molok aprova diploma ida.

Governu liuhusi Ministru Transportes no Komunikasaun, Eng.Miguel Marques Gonçalves Manetelu, Ministru Obras Públika, Samuel Marçal no Ministru Justisa, Sergio Hornai, marka audíensia ho Komisaun C Parlamentu Nasionál ne’ebé trata asuntu Finansa Públika.

Durante audiensia Ministru Transportes no Komunikasaun Eng.Miguel Marques Gonçalves Manetelu hateten implementasaun rejime ida ne’e persiza konsidera aspetu responsabilidade, transparensia no koordenasaun entre liña ministeriais sira (institusaun estadu sira) nune’e tasa administrativa sira bele jere ho Sistema no tuir prinsipiu legalidade, rejime nu’udar mekanismu ida atu hadia kontribuisaun no jestaun kona-bá imposto, tasa tuir kompeténsia nomos servisu públiku ne’ebé instutiusaun sira presta.

“MTC hahú implementa plataforma verify.gov.tl iha DNTT atu fasilita tratamentu dokumentus online no aumenta akuntabilidade rekolla tasa. Pagamentu husi públiku selu ho osan-cash laos bá funsionáriu DNTT, maibé selu diretu iha loket BNCTL. Iha problema ida ne'ebé agora lao hela iha tribunál, ne'ebé ho envolvimentu pesoál BNCTL nian iha Akanunu, la'ós husi MTC. Estadu no ministériu iha Inspetór Jerál atu halo fiskalizasaun. Kuando iha irregularidade ne'ebé boot liután, kazu ne'e sei lori bá KAK no Ministériu Públiku husu bá timor-oan hotu-hotu atu iha konsiénsia servisu bá rai nomos keta foti buat ne'ebé la'ós sira-nia direitu” dehan Ministru Manetelu iha sala plenária PN.

Prezidente Komisaun C Cedelízia Faria dos Santos subliña audiénsia ne’e atu rona governu nia hanoin kona-bá Rejime Jerál Taxa Administrativa. Preokupasaun boot mak taxa administrativa sira kolekta husi liña ministeriais no munisípiu lá harmonizadu, tanba kada entidade iha taxa rasik. Tanba ne’e, presiza harmoniza no organiza taxa sira atu evita kobransa repetida nomos fó klaridade bá públiku.

Parlamentu Nasionál sei kontinua konsulta ho liña ministeriais sira oinsá prepara enkuadramentu legál ida ne’ebé klaruz, kuerente no bele implementa ho responsabilidade.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊