Dili, 21 Setembru 2026

Ministru Transportes no Komunikasaun, Eng.Miguel Marques Gonçalves Manetelu, Segunda ne’e tun direta bá iha Depózitu Kombustível Aviasaun (Aviation Fuel Depot) ka Fasilidade Armazenamentu Avtur PITSA iha Aeroportu Internasional Prezidente Nicolau Lobato Komoro Dili, hodi hasoru malu ho Diretór Operasaun Pertamina Internasionál, Popa Damos Hutasoit.

Desizaun ne'e halo atu fó espasu ho livre bá empreza Toa ne'ebé sei ezekuta servisu konstrusaun edifísiu terminál pasajeiru foun iha Aeroportu Internasionál Prezidente Nicolau Lobato (AIPNL).

Ministru Manetelu fó ultimatu bá PITSA atu hamamuk no muda sira-nia depózitu Avtur/DPPU iha loron 17 Outubru 2026.

Razaun muda Fatin depózitu tuan ne'e tanba afeitadu direta husi projetu konstrusaun terminál foun.

Diretór Operasaun Pertamina Internasionál, Popa Damos Hutasoit hateten sira prontu atu muda bá fatin foun ne'ebé ANATL hatudu ona, oras ne'e dadaun sasan balu sira hasai no muda ona ho garantia katak abastesimentu Avtur bá aviaun sira lá para.

Fatin ne'e afeitadu tanba pozisaun jeográfika husi depózitu dedikadu ne'e :

• Iha Área Operasionál Aeroportu Nian : Fasilidade armazenamentu no tanki Avtur ne'e lokaliza iha interior ka fronteira besik área apron.

• Iha Master Plan Ekspansaun Terminál : Projetu konstrusaun terminál pasajeiru foun ne'ebé luan no modernu require totál espasu terenu ne'ebé okupa husi fasilidade depózitu tuan PITSA nian.

• Zona Seguransa (Safety Buffer Zone) : Iha padraun aviasaun internasionál (ICAO), tanki armazenamentu kombustível boot 2 no kamiaun abastesimentu labele besik liu bá edifísiu terminál pasajeiru foun tanba risku ijene no seguransa (fogo/esplosaun).

Tanba ne'e, fasilidade DPPU/Depózitu Avtur PITSA nian tenke hamamuk no muda/reloka bá área foun ne'ebé seguru liu (ne'ebé determinadu iha master plan aeroportu nian) atu konstrusaun terminál foun bele la'o ho kumpri padraun seguransa aviasaun.

https://sdi.gov.tl/ministerio/presrealease/create

𝐌é𝐝𝐢𝐚 𝐌𝐓𝐊