𝗗𝗶𝗹𝗶, 𝟭𝟳 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Vise-Prezidente Senior Japan International Cooperation Agency (JICA), Yuho Hayakawa, halo vizita kortezia bá Ministériu Obras Públikas (MOP) hodi hala'o enkontru ho Ministru Obras Públikas, Samuel Marçal.

Enkontru ne'e ho objetivu atu troka hanoin kona-bá kontinuidade kooperasaun entre Timor-Leste no Japaun no área kolaborasaun futuru ne'ebé relevante bá ministériu nomos programa asisténsia sira husi JICA.

Iha enkontru ne'e, Ministru Samuel Marçal fahe kontekstu balun kona-bá situasaun atuál Timor-Leste nian no dezafiu sira ne'ebé nasaun enfrenta.

Ministru Obras Públikas esplika katak Timor-Leste nu'udar nasaun ne'ebé vulneravel tebes bá dezastre naturál no impaktu mudansa klimátika. Tan ne'e, presiza investimentu boot bá infraestrutura resiliente hanesan sistema drenajen no protesaun bá inundasaun.

Aleinde ne'e, instabilidade polítika iha pasadu afeita dezenvolvimentu infraestrutura, enkuantu krize internasionál, hanesan funu iha Médiu Oriente, halo folin kombustível sa'e maka'as iha merkadu internasionál no afeita direta kustu konstrusaun nomos operasaun ekipamentu pezadu iha Timor-Leste.

Ministru mós hato'o agradesimentu bá Japaun ne'ebé apoia Timor-Leste dezde independénsia to'o agora. Durante dezenvolvimentu nasaun nian, Japaun fó apoiu signifikante liuhusi ekipamentu pezadu sira, ne'ebé ajuda Governu harii Instituto de Gestão de Equipamentos e Apoio ao Desenvolvimento de Infraestruturas, Instituto Públiku (IGE-ADI,I.P), nu'udar instituisaun importante bá dezenvolvimentu infraestrutura.

Ikus liu, Ministru esplika perspetiva futuru kona-bá Simeira ASEAN, ne'ebé Timor-Leste sei lidera, tan ne'e presiza infraestrutura ho kualidade internasionál.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*