𝗟𝗲𝘁𝗲𝗳𝗼𝗵𝗼, 𝟭𝟴 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Ministru Obras Públikas, Samuel Marçal, akompaña husi Vise-Ministru Infraestrutura, Júlio do Carmo, Sekretáriu Estadu Eletrisidade, Bee no Saneamentu (SEEBES), Santos Noronha, Sekretáriu Estadu Asuntus Toponímia no Organizasaun Urbana (SEATOU), Germano Santa Brites Dias, no Prezidente EDTL, E.P., ofisialmente inaugura Projetu Eletrifikasaun Komunitária (PEK) iha Suku Eraulu, Aldeia Olopana, Postu Administrativu Letefoho, Munisípiu Ermera.

Iha nia diskursu, Ministru Samuel Marçal husu bá komunidade iha Suku Eraulu atu kuidadu didi'ak infraestrutura públika sira, hanesan liña eletrisidade ne'ebé Governu hamutuk ho komunidade harii ona, atu nune'e eletrisidade bele kontinua fó benefísiu bá komunidade durante tempu naruk.

"Prezensa Governu iha Suku Eraulu la'ós de'it atu inaugura projetu eletrifikasaun, maibé mós atu rona preokupasaun no problema sira ne'ebé komunidade hasoru, liuliu iha área infraestrutura," hatete Ministru Obras Públikas.

Alende ne'e, Ministru mós hato'o apresiasaun bá komunidade tanba sira-nia kooperasaun no pasiénsia durante prosesu dezenvolvimentu projetu ne'e.

Enkuantu Prezidente EDTL, E.P., Paulo da Silva, hato'o agradese bá autoridade lokál Suku Eraulu tanba kooperasaun ne'ebé di'ak ho EDTL durante implementasaun projetu no agradese mós bá komunidade ne'ebé oferese sira-nia rai no plantasaun hodi bele realiza PEK iha suku refere.

Paulo da Silva esplika katak projetu ne'e bolu Programa Eletrifikasaun Komunitária, tanba iha implementasaun ne'e EDTL servisu diretamente ho komunidade.

"Programa Eletrifikasaun Komunitária iha Suku Eraulu ne'e realiza liuhusi servisu no dedikasaun tékniku EDTL Munisípiu Ermera, ne'ebé servisu hamutuk ho komunidade hodi asegura infraestrutura eletrisidade bele instala no utiliza ho di'ak," nia dehan.

Prezidente EDTL ne'e apela bá komunidade, liuliu inan-aman no labarik sira, atu uza eletrisidade ho kuidadu no labele halo ligasaun arbiru bainhira la hatene prosedimentu.

"Karik hakarak halo koneksaun husi uma ida ba uma seluk, tenke komunika ho tékniku EDTL," nia hateten.

Nia mós husu bá labarik sira atu labele uza fisga ka tiru bá izoladór sira iha airin leten, tanba karik izoladór nakfera, bele hamosu interrupsaun no impede transmisaun enerjia eletrisidade bá komunidade. Labele kesi animál sira iha poste ka besik liña eletrisidade, tanba bele hamosu risku bá seguransa no danu bá infraestrutura.

Suku Eraulu kompostu husi aldeia neen: Olopana ho uma-kain 121, Lequissala ho uma-kain 67, Taurema ho uma-kain 38, Eraulu Goulala ho uma-kain 28, Goulolo Goulala ho uma-kain 94, Eratoi ho uma-kain 64, no Lakau ho uma-kain 79. Totál hamutuk uma-kain 491. Husi númeru ne'e, sira asesu ona ba Programa Eletrifikasaun Komunitária (PEK).

Serimónia inaugurasaun ne'e hetan partisipasaun husi membru Governu sira, reprezentante PAM Ermera, ekipa téknika husi MOP no EDTL,Diretór Jerál MOP, kargus Xefias sira, Prezidenti Intituisaun tuteladas ho nia Vise sira, autoridade lokál, lia-na'in, lideransa komunitária, komunidade no estudante sira.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*