𝗗𝗶𝗹𝗶, 𝟮𝟰 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Ministru Obras Públikas, Sr.Samuel Marçal, ohin hasoru malu ho delegasaun Misaun Revizaun Estratéjika husi Eskritóriu Rejionál UNDP ba Azia no Pasífiku (RBAP) iha Ministériu Obras Públikas, Caicoli, kinta-feira ne’e.

Delegasaun ne'e kompostu husi Sra.Niamh Collier-Smith, Reprezentante Rezidente United Nations Development Programme (UNDP) iha Tailándia, Sra.Paola Piccione no Sr.Robert Frago, Espesialista Programa Paíz RBAP nian no Reprezentante Rezidente UNDP iha Timor-Leste, Sra.Katyna Argueta. Delegasaun UNDP bá Azia no Pasífiku hala'o vizita bá Timor-Leste ho objetivu atu apoia Eskritóriu UNDP Timor-Leste hodi asegura katak nia estrutura no kapasidade adekuadu atu entrega ho efetivu rezultadu sira iha Programa Paíz 2026-2030.

Iha enkontru ne'e, Ministru Samuel Marçal hato'o agradesimentu bá parseria UNDP nian dezde 1999 to'o agora, ne'ebé foka liu bá dezenvolvimentu área rurál sira.

"Primeiru lugar, ami hakarak hato'o obrigado barak bá apoiu husi UNDP. Ami apresia tebes tanba UNDP nafatin foka bá ami-nia área rurál sira. Ida ne'e importante tebes," dehan Ministru Marçal.

Ministru subliña katak prioridade Ministériu Obras Públikas tuir orientasaun Primeiru-Ministru nian mak bee-moos, estrada rurál no eletrisidade liuhusi painel solár bá komunidade ne'ebé hela dook husi rede nasionál.

"Ami-nia komunidade sira presiza duni apoiu. Liuliu bee hemu nian no estrada rurál hodi fasilita sira bá eskola, klínika no merkadu, tanba maioria agrikultór. Governu labele instala kabu elétriku bá fatin dook sira tanba kustu karun, tanba ne'e ami hakarak instala painel solár," nia hatutan.

Tuir dadus Ministériu nian, sei iha kuaze kilómetru 3.000 estrada rurál ne'ebé seidauk hetan rehabilitasaun. Ministru Marçal mós rekoñese katak maske Timor-Leste sei iha limitasaun orsamentál ne'ebé depende bá mina no gás, Governu agora estável ona no foka hela bá harii infraestrutura bázika nu'udar baze bá dezenvolvimentu setór sira seluk.

Enkontru ne'e remata ho kompromisu atu hametin liután kooperasaun entre Ministériu Obras Públikas no UNDP hodi suporta dezenvolvimentu sustentável iha área rurál sira.

Diretores kargu xefias sira ne’ebé akompaña Ministru Obras Públikas enkontru ho delegasaun UNDP mak Diretór Santino Barreto, Diretór Direção Nacional para a Regulação da Água e Saneamento, Residente do Conselho de Administração da EDTL, E.P., Marito Ferreira, Komissario EDTL, Roberto Marçal, Koordenador PMU Estrada, Eng.Amilcar da Costa Victor, Koordenador PMU Bee, Nelson Mesquita ho Xefe Gabineti Ministru Obras Públikas, Cristovão Fausto Guterres.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*