Dili, 22 Setembru 2026

Ministru Transportes no Komuniakasaun, Eng.Miguel Marques Gonçalves Manetelu konvoka enkontru ho PMU, PMC, Construction Supervision Consultant (CSC), Yocshin JV, Waskita Karya, PresidentE ANATL no ADN.

Objetivu husi enkontru ne’e atu estabelese entendimentu komún kona-bá kondisaun atuál projetu nian; kompara Konsultór Supervizaun nia avaliasaun ho esplikasaun sira ne'ebé fornese husi Waskita Karya; identifika kauza sira atrazu nian; avalia prontidaun dezeñu sira no pakote servisu krítiku sira no determina medida koordenasaun nomos aselerasaun ne’ebé presiza atu kompleta projetu ne’e tuir obrigasaun kontratuál interese Governu nian.

Iha nia intervensaun Ministru Manetelu hateten enkontru ne'e tuir diskusaun sira uluk nian, inklui envolvimentu ho lideransa Waskita Karya nian no informasaun ida bá Vise-Primeiru Ministru. Governu konsidera katak kompletasaun projetu ne’e presiza envolvimentu governu-bá-governu ne’ebé intensivu liu, partikularmente ho Governu Indonézia no entidade korporativa relevante sira, sein diminui responsabilidade kontratuál Waskita Karya nian.

Ministru esplika katak Governu konsidera hela senáriu oi-oin atu mantein kontinuidade obra sira nian. Hirak-ne'e bele inklui apoiu ne'ebé hametin bá Waskita Karya, envolvimentu husi parseiru ka fornesedór sira ne'ebé iha kapasidade bá pakote espesífiku sira no arranju apropriadu sira bá entrega nomos pagamentu dezeñu nian enkuantu prezerva kontratu governante. Opsaun ruma sei presiza revizaun legál, tékniku no kontratuál liután.

Ministru orienta katak aprezentasaun sira husi Konsultór Supervizaun no Waskita Karya uza hodi estabelese komparasaun objetivu ida kona-bá projetu nia estatutu, partikularmente iha relasaun ho prontidaun dezeñu nian, progresu fíziku, rekursu sira, aprovizionamentu no kalendáriu kompletasaun nian.

Konsultór Supervizaun Lee, hateten katak aprezentasaun ne'e bazeia bá dokumentu projetu nian, korespondénsia, dadus fatin nian no obrigasaun sira Kontratór nian tuir Empregadór nia Rekizitu sira. Aprezentasaun ne’e aborda kona-bá estatutu dezeñu no dezeñu sira, materiál no ekipamentu, mobilizasaun, administrasaun kontratu, pakote serbisu krítiku nomos viabilidade atu kompleta projetu.

Waskita Karya aprezenta progresu husi obra sira, rekursu sira ne'ebé mobiliza ona, atividade atuál sira iha fatin, limitasaun sira dezeñu nian, ezijénsia sira dokumentu apoiu nian, arranju asesu nian, aprovizionamentu ekipamentu nian no medida aselerasaun sira ne'ebé propoin.

Waskita Karya relata katak maizumenus unidade ekipamentu 45 to'o 46 no maizumenus pesoál 145 maka mobiliza ona iha momentu aprezentasaun nian. Rekursu sira sei ajusta tuir programa servisu no ezijénsia operasionál sira.

Iha nia intervensaun ikus Ministru hateten objetivu Governu nian atu fasilita progresu envezde impede implementasaun. Husu bá parte hotu-hotu atu mantein komunikasaun ne'ebé efetivu, fornese informasaun ne'ebé loos, hala'o sira nia responsabilidade ida-idak no hatudu sira nia kompromisu liuhusi progresu fatin ne'ebé bele sukat no kompletasaun dokumentasaun ne'ebé pendente iha tempu ne'ebé loos.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊