𝐃𝐢́𝐥𝐢, 𝟐𝟑 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔— Sekretaria Estadu Kooperativas (SEKoop) Eng. Arsénio Pereira da Silva, M.Agr., ofisialmente lansa Website Foun SEKoop, nu’udar parte husi esforsu institusionál atu moderniza no digitaliza sistema rejistu, verifikasaun no jestaun dadus partisipante sira, liuliu ba atividade no programa kooperativas, inklui preparasaun ba "𝐃𝐢́𝐥𝐢 𝐑𝐞𝐠𝐢𝐨𝐧𝐚𝐥 𝐂𝐨𝐨𝐩𝐞𝐫𝐚𝐭𝐢𝐯𝐞 𝐂𝐨𝐧𝐟𝐞𝐫𝐞𝐧𝐜𝐞, 𝐌𝐢𝐧𝐢𝐬𝐭𝐞𝐫𝐢𝐚𝐥 𝐃𝐢𝐚𝐥𝐨𝐠𝐮𝐞 𝐚𝐧𝐝 𝐀𝐒𝐄𝐀𝐍 𝐂𝐨𝐨𝐩𝐞𝐫𝐚𝐭𝐢𝐯𝐞 𝐄𝐱𝐩𝐨 𝟐𝟎𝟐𝟔 (𝐃𝐑𝐂𝐂𝐌𝐃 𝟐𝟎𝟐𝟔)".

Lansamentu website ne’e realiza iha ACAIT, Díli, iha Kuarta-feira, 23 Setembru 2026, ho objetivu atu aumenta efisiénsia servisu administrativu no fasilita asesu ba informasaun kona-ba atividade kooperativas ne’ebé organiza ka fasilita hosi SEKoop.

Website foun ne’e dezenvolve atu suporta mudansa hosi sistema rejistu manual, ne’ebé antes depende liu ba dokumentu, formuláriu no arkivu fisiku, ba sistema dijitál ne’ebé permite prosesu rejistu, rekolla, verifikasaun no jestaun dadus sai lalais, organizadu no efisiente.

Liuhusi plataforma ne’e, partisipante sira bele asesu informasaun kona-ba atividade, halo rejistu online no simu identifikasaun dijitál ne’ebé bele uza durante prosesu verifikasaun iha eventu.

Sekretáriu Estadu Kooperativas, Eng. Arsénio Pereira da Silva, hateten katak implementasaun sistema dijitál ne’e importante atu ajuda instituisaun responde ba nesesidade servisu públiku iha era teknolojia.

Liuhusi sistema ne’e, partisipante sira bele hetan 𝐐𝐑 𝐂𝐨𝐝𝐞 nu’udar parte husi prosesu identifikasaun no verifikasaun. 𝐐𝐑 𝐂𝐨𝐝𝐞 bele uza hodi fasilita prosesu check-in no verifikasaun partisipante sira durante eventu ka atividade ne’ebé organiza hosi SEKoop.

Sistema ne’e mos bele ajuda ekipa organizadora atu verifika informasaun partisipante ho maneira ne’ebé lalais no sistemátika, nune’e bele hamenus utilizasaun dokumentu fisiku no prosesu rejistu manual.

Website foun ne’e la’ós de’it nu’udar meiu ba rejistu, maibé mos nu’udar parte husi esforsu SEKoop atu hadi’a jestaun no arkivu dadus dijitál.

Dadus partisipante sira bele organiza iha sistema dijitál, hodi fasilita prosesamentu informasaun, konsultasaun no asesu ba dadus ne’ebé relevante ba atividade sira. Ida-ne’e bele ajuda SEKoop iha planeamentu atividade, preparasaun eventu no avaliasaun programa iha futuru.

Digitalizasaun ne’e mos bele kontribui ba reduza dependénsia ba papel no dokumentu fisiku, no ajuda hamenus risku perda ka dificuldade atu buka fila-fali dokumentu ne’ebé arkiva manualmente.

Website foun ne’e mos iha papel importante iha preparasaun ba DRCCMD 2026, ne’ebé sei hala’o iha Díli, Timor-Leste, husi 1 to’o 4 Outubru 2026.

DRCCMD 2026 sei reúnem reprezentante governu, autoridade sira, policymaker, reprezentante kooperativas no federasaun kooperativas, peritu no akademiku, parseiru dezenvolvimentu, setor privadu no sosiedade sivíl.

Iha kontestu eventu ida-ne’e, utilizasaun plataforma dijitál bele fasilita prosesu rejistu no jestaun informasaun partisipante sira, liuliu iha atividade ho partisipante sira mai husi Timor-Leste no nasaun ASEAN sira.

SEKoop espera katak implementasaun sistema dijitál ne’e bele kontribui ba aumenta efisiénsia servisu, hadi’a organizasaun dadus, fasilita verifikasaun, aumenta transparénsia no apoia prestasaun servisu públiku ne’ebé adapta ho dezenvolvimentu teknolojia.

Plataforma ne’e mos representa pasu ida hosi SEKoop atu kontinua promove inovasaun iha jestaun administrativu no uza teknolojia dijitál hodi responde ba nesesidade komunidade no setor kooperativas.

Lansamentu website foun ne’e marka kompromisu SEKoop atu kontinua moderniza sistema servisu no utiliza teknolojia nu’udar instrumentu importante hodi suporta jestaun dadus, komunikasaun institusionál, rejistu dijitál no organizasaun atividade kooperativas.

Ho inisiativa ida-ne’e, SEKoop sei kontinua dezenvolve sistema dijitál ne’ebé bele fasilita servisu, aumenta asesibilidade informasaun no suporta dezenvolvimentu setor kooperativas iha Timor-Leste iha era digital.

#𝐌𝐞𝐝𝐢𝐚_𝐒𝐄𝐊𝐨𝐨𝐩𝟐𝟎𝟐𝟔

See less