𝟐𝟑 𝐒𝐞𝐭𝐞𝐦𝐛𝐫𝐮 𝟐𝟎𝟐𝟓
===============
Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay akompaña Prezidente Repúblika (PR), José Ramos-Horta ho Primeiru-Ministru (PM), Kay Rala Xanana Gusmão simu Primeiru-Ministru (PM), Malázia, Dato' Seri Anwar Ibrahim iha Aeroportu Internasionál Prezidente Nicolau Lobato Comoro.

Primeiru-Ministru (PM) Malázia, Dato' Seri Anwar Ibrahim to’o iha Aeroportu Internasionál Prezidente Nicolau Lobato Comoro iha tuku 15:00 otl  iha loron Tersa, 23 Setembru 2025. 

Iha Aeroportu, simu ho parade militár akompaña mós ho tebe-tebe Timor nian, drum band hosi estudante sira Eskola São Pedro Comoro no mós Ensinu Sekundáriu Jerál An-Nur Kampung Alor.

Akompaña hodi simu PM Malázia mak hanesan, Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, membru Governu balun, Embaixadór Malázia iha Timor-Leste, Amarjit Sarjit Singh no Embaixadór Timor-Leste bá Malázia, Lisualdo Gaspar.

Hosi Aeroportu Comoro, Prezidente Repúblika, José Ramos-Horta mak tula Primeiru-Ministru, Dato' Seri Anwar Ibrahim ho karreta privada bá to’o iha Palásiu Prezidente Nicolau Lobato Bairru-Pité no kontinua kedan ho enkontru bilaterál.
 
Eskola sira iha Dili laran mós mobiliza-an hodi hamrik iha dalan protokolu hosi Aeroportu Comoro to’o Palásiu Prezidente, kaer bandeira nasionál Timor-Leste nian no mós Bandeira Malázia hodi hato’o ben vindo bá Primeiru-Ministru (PM), Malázia, Dato' Seri Anwar Ibrahim ho ekipa.