𝐉𝐚𝐰𝐚 𝐓𝐢𝐦𝐮𝐫. 𝟐𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 || Sekretáriu Estadu Pekuária (SEP), Sua Excelénsia Sekretáriu Estadu Pekuária, 𝐉𝐨𝐬é 𝐕𝐢𝐞𝐢𝐫𝐚 𝐝𝐞 𝐀𝐫𝐚ú𝐣𝐨. 𝐋𝐢𝐜. 𝐂𝐒𝐇., 𝐋𝐢𝐜. 𝐃𝐢𝐫. 𝐌𝐃., 𝐌.𝐀𝐏., hamutuk ho ekipa delegasaun, hala’o vizita servisu ba 𝐄𝐦𝐩𝐫𝐞𝐬𝐚 𝐂𝐡𝐚𝐫𝐨𝐞𝐧 𝐏𝐨𝐤𝐩𝐡𝐚𝐧𝐝 𝐉𝐚𝐲𝐚 𝐅𝐚𝐫𝐦 (𝐂𝐏𝐉𝐅),Gempol, Jawa Timur, Indonesia, hodi haree diretamente sistema no teknolojia ne’ebé implementa iha indústria avikultura.

Iha vizita ne’e, SEPE haree diretamente prosesu produsaun, manejementu manutolun no sistema bioseguransa ne’ebé aplika iha unidade produsaun empresa refere. Observasaun ne’e inklui maneira manejamentu manu, kontrolu saúde animal, alimentasaun, higiene, sanitasaun no prosedimentu bioseguransa hodi prevene risku moras no asegura qualidade produsaun.

Aleinde ne’e, delegasaun SEPE mós haree sistema hatchery, husi proses inkubasaun, penetasan, seleksaun, vaksinasaun no preparasaun Day Old Chick (DOC) antes distribusaun ba unidade produsaun.

Vizita mós inklui observasaun kona-ba sistema layer no produsaun Manutolun, no kontrolu produsaun, alimentasaun, saúde animal no aplikasaun prosedimentu tékniku iha farm.

Vizita ba CPJF Gempol ne’e mós parte hosi kontinuasaun enkontru no diskusaun SEPE ho parseiru no instituisaun relevante sira iha Indonesia, ne’ebé antes ne’e hala’o ona hodi buka oportunidade kooperasaun no fahe esperiénsia iha área pekuária no veterinária.

Iha prosesu ne’e, SEPE kontinua foka ba oportunidade kooperasaun iha área breeding, hatchery, DOC, layer, produsaun hahán animal (PAKAN), inseminasaun artifisial, saúde animal no bioseguransa, ho objetivu atu haforsa kapasidade téknika no dezenvolvimentu setor avikultura iha Timor-Leste.

Aleinde produsaun iha área avikultura, Empresa Charoen Pokphand Jaya Farm mós dezenvolve sistema produsaun integradu ne’ebé envolve prosesamentu produtu hahán, inklui sosis no variedade produtu hahán transformadu sira seluk. Sistema ida-ne’e hatudu oinsá produsaun animal bele liga diretamente ho prosesamentu no dezenvolvimentu produtu ho valor aumenta, husi matéria-prima to’o sai produtu final ba konsumidór.

SEPE kontinua haforsa parseria no transfere koñesimentu tékniku hosi esperiénsia relevante iha rai liur, hodi apoia dezenvolvimentu sistema produsaun avikultura sustentável, aumenta kapasidade rekursu umanu no kontribui ba hasa’e produsaun animal no seguransa ai-han iha Timor-Leste.