𝐃Í𝐋𝐈, 𝟐𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 — Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kinta ne’e loke atividade enkontru koordenasaun ho Parseiru Dezenvolvimentu sira hosi nasionál no internasionál ho tema “Hametin Sistema Produsaun Ai-han Akuátiku Nasionál”.

Atividade ne’e hala’o iha Salaun Ministério da Agricultura, Pecuária, Pescas e Florestas (MAPPF), Comoro, Dili, ho objetivu atu hametin koordenasaun no kolaborasaun entre parte relevante sira hodi dezenvolve sistema produsaun ai-han akuátiku ne’ebé sustentável no responde ba nesesidade populasaun.

Tanba ne’e iha intervensaun Ministru Interinu nian, hato’o agradesimentu ba Parseiru Dezenvolvimentu sira hanesan WorldFish, Blue Venture no sira seluk, tanba durante ne’e servisu hamutuk hodi dezenvolve setór peskas no akuikultura.

“Ita-nia enkontru ne’e, bele fahe informasaun ba malu, kona-ba dezafiu sira, oinsá mak atu bele buka solusaun ba ita-nia problema sira”.

Alende ne’e, nia ezije mós tekniku no parseiru sira atu prepara dadus ho didi’ak kona-ba programa sira ne’ebé implementa iha terenu.

Iha atividade ne’e, partisipante sira diskute no fahe hanoin kona-ba dezafiu, oportunidade no prioridade sira iha dezenvolvimentu atividade akuátiku, inklui esforsu atu aumenta produsaun no kontribuisaun ba setór peskas no akuakultura ba seguransa ai-han nasionál.

Ministériu Agrikultura, Pekuária, Peskas no Florestas kontinua komprometidu atu hametin setor peskas no akuakultura liuhosi koordenasaun, planeamentu no implementasaun programa sira ne’ebé orienta ba sustentabilidade no benefísiu ba komunidade.