𝐃Í𝐋𝐈, 𝟐𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 — Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kinta ne’e, entrega bero unidade ida kompostu ho mákina, jaket salva vida no ankor ba estudante sira husi Departamentu Peskas, Faculdade Agrikultura, Universidade Nasionál Timor-Leste (UNTL), iha Hera.

Entrega bero ne’e nu’udar parte husi apoiu Ministério Agrikultura, Pekuária, Peskas no Florestas (MAPPF) ba dezenvolvimentu edukasaun no formasaun prátika iha área peskas, liuliu ba estudante sira ne’ebé hala’o estudu no atividade prátika diretamente relasiona ho setór peskas.

Bero ne’e sei uza hodi suporta estudante sira iha realizasaun atividade prátika, observasaun no peskiza iha tasi, nune’e estudante sira bele aumenta koñesimentu no esperiénsia kona-ba atividade peskas no rekursu maritimu.

Dr. Domingos “Mau-caro” subliña katak dezenvolvimentu setór peskas presiza apoiu ba dezenvolvimentu rekursu umanu, tanba estudante no joven sira mak sei sai profisionál no kontribuinte importante ba dezenvolvimentu setór peskas iha futuru.

MAPPF kontinua kompromete atu hametin kooperasaun ho UNTL, hodi suporta dezenvolvimentu kapasidade, peskiza no formasaun estudante sira iha área peskas, nune’e bele kontribui ba dezenvolvimentu sustentável setór peskas iha Timor-Leste.

Iha serimónia ne'e, partisipa hosi Pro-Reitór UNTL, Reprezentante Instituisaun F-FDTL, Komponente Naval, Dekanu Fakuldade Agrikultura, Dosente no entuziasmu hosi estudante sira departamentu Peskas nian.