𝐃Í𝐋𝐈, 𝟐𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 — Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, kinta ne’e, lidera Enkontru Revizaun Missaun Estratéjika ho United Nations Development Programme (UNDP), ne’ebé hala’o iha Sala VIP Ministériu Agrikultura, Pekuária, Peskas no Florestas (MAPPF), Comoro, Dili.

Enkontru ne’e foka ba revizaun no avaliasaun kona-ba misaun estratéjika, prioridade no programa sira ne’ebé liga ho kooperasaun entre MAPPF no UNDP, liuliu iha área agrikultura, pekuária, peskas no floresta.

Iha enkontru ne’e, Ministru Interinu Dr. Domingos “Mau-caro”, halo diskusaun ho ekipa UNDP kona-ba progresu servisu, dezafiu sira ne’ebé hasoru no prioridade sira ne’ebé presiza tau atensaun iha tempu oin mai.

Diskusaun mós aborda oportunidade atu hametin liután kooperasaun entre MAPPF no UNDP, hodi apoia implementasaun programa dezenvolvimentu sustentável no responde ba nesesidade komunidade sira, liuliu iha setór agrikultura, pekuária, peskas no floresta.

Ministru Interinu subliña importánsia koordenasaun di’ak entre Governu no parseiru dezenvolvimentu, atu garante katak programa no apoiu sira ne’ebé hala’o bele fó benefísiu konkretu ba komunidade no kontribui ba dezenvolvimentu nasionál.

Enkontru ne’e mós sai nu’udar oportunidade atu hametin komitementu hamutuk no identifika área prioritária ba kolaborasaun iha futuru, ho objetivu atu hasa’e produtividade no dezenvolvimentu sustentável iha setór sira ne’ebé tama iha responsabilidade MAPPF.

Hafoin soru-mutuk, Ministru Interinu entrega mós prezente Kafe Timor no Tais ba parseiru sira hanesan tradisaun aumezmu tempu kontinua kesi amizade iha servisu hamutuk hodi kontribui ba dezenvolvimentu nasionál.