𝐃𝐈𝐋𝐈, 𝟐𝟓 𝐒𝐄𝐓𝐄𝐌𝐁𝐑𝐔 𝟐𝟎𝟐𝟔 — Ministru Agrikultura, Pekuária, Peskas no Florestas Interinu, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta ne’e, ofisialmente loke Workshop Nasionál Marine Spatial Planning (MSP) – Technical Guidelines, iha Timor Plaza, Dili.

Workshop ne’e fó atensaun ba esforsu nasionál atu hametin Ordenamentu no Gestaun Espasu Marítimu Nasionál, hodi suporta dezenvolvimentu Ekonomia Azul ne’ebé reziliente no sustentável iha Timor-Leste.

Iha nia liafuan abertura, Dr. Domingos subliña katak Peska no Akikultura inklui iha setór xave sira ba dezenvolvimentu Ekonomia Azul. Tanba ne’e, informasaun no dadus husi ministériu, akademia, sientista, ajénsia dezenvolvimentu, ONG no setór privadu importante tebes atu sai baze no referénsia ba planeamentu espasu marítimu.

Ministru Interinu mós orienta Diretor-Geral Peska, Aquicultura no Gestaun Rekursu Aquátiku atu kontinua prepara dadus no informasaun kona-ba peska no akikultura, no hametin kordeenasaun ho entidade relevante sira, inklui Task Force/Grupu Trabalhu Nasionál ba Blue Economy, hodi suporta preparasaun esbosu Marine Spatial Planning (MSP).

Iha oportunidade ne’e, Ministru husu ba partisipante sira atu partisipa ativu iha diskusaun, fahe esperiénsia, fornese informasaun no dadus relevante, hodi hametin prosesu planeamentu no gestaun espasu marítimu ba interese dezenvolvimentu nasionál.

Workshop ne’e marka kompromisu hamutuk entre instituisaun no parte relevante sira atu harii gestaun espasu marítimu ne’ebé organizadu, sustentável no orientadu ba futuru Timor-Leste.