Dili, 19 Setembru 2023- Sekretária Estadu Formasaun Profisionál no Empregu liu-husi Diresaun Nasionál Empregu Exteriór, ne’ebé servisu hamutuk hó HRD Korea (Human Resource Development Service off Korea) Tersa-Feria ohin iha edifísiu DNEE Bekora, realiza skill teste ba joven timor-oan na’in 490 ne’ebé pasa ona exame EPS-Topik lian korea área fabrika tinan ne’e.

Iha intervista Diretór Diresaun Nasionál Empregu Exteriór Filomeno Soares hateten, hahú ohin to’o Sexta-Feria semana ne’e, SEFOPE hamutuk hó reprezentante HRD Korea realiza skill teste ba joven timor-oan na’in atus-haat-sia-nulu (490) ne’ebé pasa ona exame EPS-Topik lian korea área fabrika iha fulan kotuk, no teste ne’e kada loron ema na’in atus-ida (100).

Nia afirma husi teste ne’e karik pasa, maka kandidatu sira sei supmete dokumentus mai iha Sekretária Estadu Formasaun Profisionál no Empregu liu-husi Diresaun Nasionál Empregu Exteriór hodi rezista ba iha sitema EPS (Employment Permit System) hodi hein kontratu mai husi Ministeriu Traballu Korea Súl.

Dirizente ne’e mós aplea ba joven timor-oan na’in atus-haat-sia-nulu (490) ne’ebé tuir teste ne’e, atu aproveita hó didi’ak, tanbá atu liu no la-liu bazeia ba ema ida-idak nia esforsu, tanbá fó valor husi reprezentante HRD Korea, ekipa SEFOPE liu-husi Diresaun Nasionál Empregu Exteriór fasilita de’it.

Ikus jestór ne’e husu konkorente hira ne’e, karik pasa atu kuidadu nafatin saude, tanbá atu kompleta dokumentus persiza rezultadu saude ne’ebé di’ak, no karik ba sira ne’ebé la-pasa husi skill teste ne’e atu labele lakon vontade, optimista nafatin hodi he’in fila-fali teste iha tinan oin.