Dili loron 14, fulan-Setembru, tinan 2026, Sekretáriu Estadu ba Formasaun Profisionál no Empregu Sua Exelénsia Rogério Araújo Mendonça L.Ed, lansa rezultadu estudu peskiza buka tuir graduadu (Tracer Studies 2025) no Imajén Jerál Merkadu Traballu tinan 2025, edisaun 15 iha Centru Nasional Formasaun Profisionál Becora.

Iha serimónia Sekretáriu Estadu hateten, peskiza ida ne'e Importante tebes ho objetivu hodi Buka tuir graduadu sira no hatudu imajén traballu tuir peskiza tinan 2025.

"Publikasaun Relatóriu Peskiza Imajen Jerál Merkadu Traballu 2025 no Estudu Graduadu Tinan 2025 iha Timor-Leste marka pasu importante ida iha esforsu nasionál atu komprende no hadi'a situasaun merkadu traballu iha ita-nia país," hateten Sekretáriu Estadu iha serimónia lansamentu iha Senai Becora.

Sekretáriu Estadu akresenta katak, ema hotu iha responsabilidade no kontribui hodi fo oportunidade ba ema hotu asesu ba servisu, liuhusi peskiza ida ne'e sai referénsia ba forsa Traballu iha Timor-Leste.

"Ha'u konvida ita hotu atu uza rezultadu peskiza ida-ne'e ho responsabilidade no seriedade, hodi kontribui ba formulasaun polítika públika ne'ebé efetiva, inkluziva no orientada ba kriasaun oportunidade empregu ba sidadaun hotu," Tenik Governante ne'e.

"Ho espírito kooperasaun, inovasaun no kompromisu, ha'u fiar katak Timor-Leste bele dezenvolve forsa traballu ne'ebé kualifikadu no kompetente, kapaz atu responde ba dezafiu nasional no internasionál. oportunidade iha merkadu traballu," dehan Sekretáriu Estadu.

Governante ne'e, hato'o nia apresiasaun ba Diresaun Centru Informasaun Merkadu Traballu (CIMT) ne'ebé mak servisu makas hodi halo publikasaun ba peskiza ida ne'e ho susesu.

"Ha'u mós hato'o parabéns ba ita bo'ot sira hotu tanba susesu publika rezultadu estudu ne'e, espera katak relatóriu ida ne'e sei sai referénsia importante ba dezenvolvimentu polítika no programa merkadu traballu iha futuru," tenik S.E.

"Apresia mos ba DG-SENE ho Director CIMT ho ekipa tekniku, peskizadòr sira, instituisaun públika no parseiru hotu ne'ebé fó kontribuisaun durante prosesu halibur, analiza no prepara dadus no informasaun kona-ba situasaun merkadu traballu no Estudu Buka Tuir Graduadu iha ita-nia país," hatutan Sekretáriu Estadu.

Importánsia tebes Peskiza kona-ba Imajen Merkadu Traballu 2025, Publikasaun relatóriu ida-ne'e la'ós de'it dokumentu estatístika ida, maibé sai nu'udar instrumentu importante ida hodi komprende ho kle'an liután kona-ba realidade merkadu traballu iha Timor-Leste.

Merkadu traballu mak área estratéjika ida ne'ebé diretamente liga ho dezenvolvimentu ekonomia, bem-estar sosial no futuru juventude sira nian.

Governu kontinua komprometidu atu dezenvolve rekursu umanu Timor-Leste ne'ebé kompetente, produtivu no kapaz atu responde ba nesesidade dezenvolvimentu nasional. Iha kontestu ida-ne'e, preparasaun juventude ho kualifikasaun no kompeténsia profisionál sai prioridade importante.