𝐁𝐀𝐔𝐂𝐀𝐔, 𝟐𝟖 𝐒𝐄𝐓𝐄𝐌𝐁𝐑𝐔 𝟐𝟎𝟐𝟔 — Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, segunda liubá hamutuk ho Ministru Agrikultura, Pekuária, Peskas no Florestas, 𝐄𝐧𝐠. 𝐌𝐚𝐫𝐜𝐨𝐬 𝐝𝐚 𝐂𝐫𝐮𝐳, akompaña hosi Reprezentante Prezidente Autoridade Munisípiu Baucau, entrega ró unidade 12 ba Grupu peskadór sira iha Postu Administrativu Laga, Munisípiu Baucau.

Apoiu ne’e mós inklui fasilidade peska hanesan jaket salva-vida, mákina motor, ankor no tali, ne’ebé destinadu atu apoia atividade peska no aumenta seguransa ba peskadór sira bainhira hala’o atividade iha tasi.

Iha intervensaun Sekretáriu Estadu Peskas nian, apresia vontade peskadór sira iha Laga, maibé nafatin motiva atu kontinua badinas kaer ikan hodi bele hasae produsaun.

“Governu iha obrigasaun halo investimentu, maibé imi iha obrigasaun atu halo atividade hodi bele kontribui ba rendimentu estadu no ba imi-nia família”.

Alende ne’e nia afirma katak, apoiu hirak ne’e ba kaer ikan, maibé ezije mós peskadór sira atu sai fontes informasaun hodi bele asegura tasi Timor-Leste hosi atividade ilegál.

Nia hatutan, atu asegura Timor-Leste, la’ós membru Governu sira mesak, ne’e responsabilidade ema hotu nian.

Maibé, Lideransa Peskas ne’e, informa katak, atribuisaun ekipamentu no ró hirak ne’e hatudu kompromisu Governu liuhosi Ministériu Agrikultura, Pekuária, Peskas no Florestas nian atu kontinua apoia komunidade peskadór sira, liuliu iha melhoria kondisaun servisu, seguransa no produtividade iha setór peskas.

Ikus nia dehan, governu hein katak ho apoiu ne’e, peskadór sira iha Laga bele uza ekipamentu hirak ne’e ho di’ak no responsavel hodi kontinua dezenvolve atividade peska ne’ebé sustentável no kontribui ba dezenvolvimentu ekonomia komunidade no seguransa ai-han iha territóriu.

Partisipa iha serimónia entrega ró hirak ne’e, autoridade munisipais, autoridade suku, Komandu PNTL Munisípiu Baucau, Veteranus, konvidadu no peskadór sira.