Dili, 29 Setembru 2026

Filme “𝐑𝐄𝐙𝐈𝐒𝐓𝐄́𝐍𝐒𝐈𝐀 𝐤𝐚 𝐑𝐄𝐒𝐈𝐒𝐓𝐀𝐍𝐂𝐄 𝟏𝟗𝟕𝟓–𝟏𝟗𝟗𝟗” halo estreia iha Platinum Cineplex, iha Timor-Plaza ho prezensa PM Xanana Gusmão, Ministru transportes no Komunikasaun, Eng.Miguel Marques Gonçalves Manetelu, membru governu, veteranu no konvidadu sira husi entidade oioin. Filme ne’e rasik ho durasaun oras rua, Autor no produtór prinsipál bá filme dokumentáriu ne'e maka Ian White ho inisiativa no parseria husi eis-Xefe Misaun UNAMET iha Timor-Leste iha tinan 1999, Ian Martin.

Projetu produksaun filme ne'e mós hetan apoiu liuhusi kooperasaun entre ;

• Gabinete Primeiru-Ministru Timor-Leste (Kay Rala Xanana Gusmão)

• Arquivo & Muzeu da Resistência Timorense (AMRT, I.P.)

Xefe Gabinete Primeiru-Ministru, Elisabeth Expostu iha nia diskursu hateten Filme ne’e konta kona-bá história rezisténsia Timor-Leste nian iha periodu 1975–1999, liuhusi testamuñu husi ema sira ne’ebé moris direta iha tempu ne’ebá.

Luta no sakrifísiu boot husi jerasaun anterior kontra okupasaun maka loke dalan bá libertasaun nasaun nian no bá direitu povu Timor-Leste nian atu determina rasik sira-nia futuru.

Filme ne’e sai hanesan lisaun no eransa istória ida bá jerasaun foin sae sira, atu hatene katak liberdade ne’ebé sira goza ohin loron mai husi sakrifísiu luta nian.

Diretór Metresi Film Production, Ian White, hato'o agradesimentu boot bá Governu Timor-Leste liu-liu Gabinete Primeiru-Ministru no Gabinete Prezidénsia da Repúblika, Eis-Xefe Misaun UNAMET, Ian Martin, Dili International Film Festival no entidade hotu ne'ebé apoia produsaun no lansa filme ne'e.

Ian White sente onradu simu konfiansa ho responsabilidade boot atu prodúz projetu filme históriku ida ne'e. Nia mós lahaluha Agradese bá ekipa produsaun nian bá ema hotu ne'ebé fó testamuñu no entrevista, liuliu bá sira-nia korajen boot atu fahe istória luta rezisténsia rasik aleinde ne’e nia hato'o respeitu aas tebes bá veteranu sira hotu ne'ebé safrifika an iha luta bá ukun rasik an.

Eis-Xefe Misaun UNAMET iha Timor-Leste iha tinan 1999 Ian Martin iha nia diskursu afirma Luta tinan 24 Timor-Leste nian hela metin iha história nasaun nian no iha membru UNAMET 1999 sira-nia fuan, ne'ebé aprende diretu kona-bá istória ne'e husi timoroan sira ne'ebé servisu hamutuk ho sira.

nia rekoñese sakrifísiu, Pesoál timoroan iha UNAMET nian hasoru risku no perigu ne'ebé boot liu iha tempu konsulta populár 1999 nian.

Inisiativa Produsaun Filme Dokumentáriu mai husi Ian White hamutuk ho ekipa, diskute importánsia dokumentáriu ne'e, ne'ebé ikus mai hetan apoiu no realizasaun husi Gabinete Primeiru-Ministru nian ho padraun no kualidade aas ne'ebé dirije husi Ian White.

https://sdi.gov.tl/ministerio/presrealease/create

Média MTK