𝗟𝗮𝗸𝗹𝘂𝗯𝗮𝗿,𝟯𝟬 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲

Ekipa konjunta ne'ebé kompostu husi ekipa tékniku Ministériu Obras Públikas (MOP) ho Ajénsia Dezenvolvimentu Nasionál (ADN, I.P.) remove (hasai) Base Course ho naruk metru 800 iha Road Upgrading Project Laclubar Juction bá Laclubar Town (Package 3a,3b,3c &3d) Sta. 00+00-10+360, Munisípiu Manatuto, nebe’e implementa husi kompañia R.D. Interior Junior Construction (Philippines) In JV With Sino Road And Bridge Group Co.Ltd.

Durante inspesaun iha terrenu, ekipa MOP destakadu identifika katak servisu bá item Base Course ne’ebé ona hala’o ho naruk aprosimadamente 800 metru, materiál servisu lá kumpre ho espesifikasaun téknika ne’ebé aplika bá projetu refere.

Bazeia bá observasaun téknika ne'e, ekipa determina atu hapara temporariamente servisu Base Course iha seksaun refere, hodi prevene kontinuidade servisu ne'ebé bele afeta kualidade no durabilidade estrutura pavimentu nian.

Antes sobu Base Course, ekipa in-house hamutuk ho kompañia no ekipa tékniku MOP Munisípiu Manatuto foti amostra Base Course husi área afetada iha Sta. 0+900, Sta. 1+200 no Sta. 1+860, no haruka bá Laboratóriu Nasionál MOP atu hala'o teste laboratoriál tuir parámateru no espesifikasaun téknika relevante. Rezultadu teste laboratoriál hatudu katak amostra refere la kumpri (failed/not passed) rekezitu tékniku ne'ebé estabelese ona.

Bazeia bá rezultadu teste no evidénsia téknika iha terrenu, materiál ne'ebé uza bá Base Course lá prienxe kritériu. Ho nune'e, UIVP-MOP halo koordenasaun imediata ho Laboratóriu Nasionál MOP, Ajénsia Dezenvolvimentu Nasionál (ADN, I.P.), ekipa MOP Munisípiu Manatuto inklui ekipa in-house hodi determina asaun korektiva bá servisu ne'ebé lá kumpri kritériu.

Nune'e, iha 29 Setembru 2026, ekipa konjunta husi UIVP-MOP, Laboratóriu Nasionál MOP, ADN, I.P., MOP Destakadu no in-house halo verifikasaun iha terrenu no determina atu hasai/sobu (remove) Base Course ne'ebé la kumpri kritériu no espesifikasaun téknika, hodi halo substituisaun no re-ezekusaun tuir espesifikasaun aprovada nomos rekezitu kontrolu kualidade projetu nian.

https://sdi.gov.tl/ministerio/presrealease/create

*𝗠𝗶́𝗱𝗶𝗮-𝗠𝗢𝗣*