Díli-Tersa 23/09/2025, Ministériu Finansas liuhusi Sua Exelénsia Ministra Finansas Sra. Santina José Rodrigues F. Viegas Cardoso, hamutuk ho Komisáriu Autoridade Aduaneira Sr. Joanico Pinto, Governadór Banku Sentrál (BCTL) no Prezidente Banku Nasionál Komersiu Timor-Leste (BNCTL) Halo Lansamentu Pagamentu Taxa Aduaneira liuhusi internet no Mobile Banking ba públiku, seremónia ne’e hala’o iha salaun Ministériu Finansas Aitarak-Laran Díli.

Liuhusi serbisu hamutuk entre ekipa Janela únika nasionál husi Autoridade Aduaneira no Banku Nasionál Komersiu Timor-Leste (BNCTL), dezenvolve ona plataforma internet no mobile banking ne’ebé destinadu atu fasilita ita-nia komunidade komersiante sira hodi utiliza halo pagamentu taxa iha kualkér fatin no tempu.

Dezenvolvimentu ida ne’e hola parte iha kompromisu IX Governu Konstitusionál nian atu moderniza ita-nia prosesu sira hodi hasa’e efisiensia, transparénsia no reduz kustu aumezu tempu promove boa governasaun hodi kontribui ba hasae kapasidade instituisionál no dudu kresimentu ekonomia iha Timor-Leste.

“Benefísiu imediata no praktikál mak ba importadór no exportador sira tanba la presiza ona aprosima Banku ba halo no la enfrenta prosesu Burokrasia. Ita sei la presiza ona imprime dokumentu barak hodi resolve asuntu pagamentu no bele ona prosesa pagamentu iha ne’ebé de’it, iha kualkér tempu ka oras hodi liberta sasan ka merkadorias ne’ebé maka to’o ona iha portu”, Dehan Sua Exélensia.

Aleinde ne’e, Komisáriu Autoridade Aduaneira Sr. Joanico Pinto hateten, “pagamentu ida ne’e ita halo ho forma seguru no lais liu, fasilidade ne’e atu kompleta liután plataforma P24 ne’ebé tinan kotuk ita lansa ho autorizasaun husi Banku Sentrál Timor-Leste nian.

“Eventu ida ohin mós nu’udar parte ida ita-nia komprimísu ba padraun internasionál sira liuliu ba World Trade Oranization (WTO) no World Custom Organization (WCO) ne’ebé Timor-Leste membru ona, nomós AZEAN ne’ebé ita sei sai membru iha fulan Outubru oin mai.”

Ejiji ita atu halo pagamentu eletróniku ida ne’ebé bele fasilita atividade komersiu flexivel liu, efisiente, seguru no transparánte liután, Autoridade Aduaneira sei serbisu barak liután ho banku sira hotu, hodi loke opsaun seluk liuliu pagamentu sira ne’ebé uza visa card, master card no union pay no fasilidade bankaria sira seluk.

Iha okaziaun ida ne’e mós Sua Exelénsia Ministra Finansas Sra. Santina José Rodrigues F. Viegas Cardoso, ho Prezidente Komisaun Ezekutiva BNCTL Marcelo Carvalho, asina amandamentu dahuluk ba protokolu koperasaun entre Autoridade Aduaneira no BNCTL.

Atividade ne’e organiza husi Autoridade Aduaneira, hetan prezensa másimu husi Banku Sentrál Timor-Leste (BCTL-sigla portugés), Banku Nasionál Komersiu Timor-Leste (BNCTL-sigla portugés), Diretor Jerál Husi Ministériu Finansas, entidade estadu, parseiru dezenvolvimentu inklui korpu diplomátiku.

Fontes: https://www.facebook.com/share/p/19aCmTjcdH/