𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟬𝟮 𝗢𝘂𝘁𝘂𝗯𝗿𝘂 𝟮𝟬𝟮𝟲, Ministériu Justisa, liuhosi Diresaun-Jeral Terras no Propriedades (DGTP sigla Portugés), hala’o formasaun kona-ba Sistema Informasaun Jestaun Terrenu (Land Management Information System – LMIS), ne’ebé hala’o durante loron rua, hosi loron 01 to’o 02 Outubru 2026, iha sala Ministériu Justisa, Kolmera, Díli.

Objetivu hosi formasaun ida-ne’e, atu hametin no hadi’a kapasidade téknika funsionáriu sira iha área jestaun terrenu no propriedade, liuliu iha utilizasaun sistema informasaun ne’ebé bele apoia prosesu administrasaun, jestaun no atualizasaun dadus kona-ba terrenu no propriedade ho forma ne’ebé efisiente, sistemátiku no integradu.

Inisiativa ne’e mós sai parte hosi esforsu Ministru Justisa, Dr. Sérgio de Jesus Fernandes da Costa Hornai, hodi moderniza sistema jestaun terrenu no propriedade, hodi asegura prestasaun servisu públiku ne’ebé efisiente, transparente no responsivu, tuir prioridade no programa dezenvolvimentu IX Governu Konstitusionál.

Formasaun ne’e, bazeia ba Akordu Kooperasaun ne’ebé asina iha loron 03 Juñu 2026, entre Diretór-Geral Terras no Propriedades no Diretór Ezekutivu TIC Timor, hodi hametin kooperasaun téknika iha área teknolojia informasaun no dezenvolvimentu sistema dijitál ba jestaun terrenu no propriedade.

Durante formasaun, ekipa formadór hosi TIC Timor fahe matéria téknika kona-ba utilizasaun no funsionamentu LMIS, inklui aspetu sira ne’ebé relasiona ho jestaun dadus, prosesamentu informasaun no utilizasaun sistema atu apoia prosesu servisu administrativu iha área terrenu no propriedade.

Governu fó prioridade ba dezenvolvimentu rekursu umanu, digitalizasaun no modernizasaun sistema jestaun terrenu, hodi hametin jestaun terrenu no propriedade iha Timor-Leste no fó apoiu ba prestasaun servisu públiku ne’ebé efisiente, asesível no responsivu ba sidadaun sira.

Diretór Unidade Arrendamentu Bens Imóveis do Estadu (UABIE), Helder Cosme Marçal Belo, hato’o agradesimentu no apresiasaun ba TIC Timor. Tanba apoiu no kolaborasaun ne’ebé fó iha prosesu dezenvolvimentu institusionál, liuliu iha área teknolojia no sistema informasaun, hodi hafasil kualidade atendimentu ba públiku.

Iha Formasaun ne’e, partisipa másimu hosi funsionariu sira ne’ebé mai hosi Diresaun Unidade Arrendamentu Bens Imóveis do Estadu no Direasaun Nasionál Sistema no Kadastru (DNSC) no seluk tan.