𝗗Í𝗟𝗜, 𝗠𝗝 — 𝗞𝘂𝗮𝗿𝘁𝗮-𝗳𝗲𝗶𝗿𝗮, 𝟯𝟬 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Diretór-Jerál Polítika Justisa, Dr. Nelinho Vital, reprezenta Ministru Justisa, nia naran, hato’o boas-vindas ba ekipa hosi International Cooperation Department (ICD) no Ministériu Justisa Japaun, no loke ofisialmente diskusaun kona-bá krime sibernétiku, ne’ebé hala’o iha Sala Ministériu Justisa, Kolmera, Díli.

Objetivu hosi diskusaun ne’e, atu haforsa no aprofunda koñesimentu no kapasidade entidade relevante sira iha Timor-Leste kona-ba prevensaun, investigasaun no kombate krime sibernétiku, no mós atu haforsa kooperasaun institusionál no fahe esperiénsia entre instituisaun sira iha área ne’e.

Reprezentante hosi Ministériu Justisa Japaun, Kaya Tomonobu no Atsushi Ito, aprezenta materiál no diskute ho funsionáriu sira hosi Diresaun-Geral Polítika Justisa (DGPJ) kona-ba asuntu sira relasionadu ho krime sibernétiku, inklui prosesu no métodu investigasaun. Atividade ne’e nu’udar parte hosi implementasaun Akordu Kooperasaun iha Setór Justisa entre Ministériu Justisa Timor-Leste no Ministériu Justisa Japaun, ne’ebé estabelese iha tinan 2025.

Durante diskusaun, reprezentante sira hosi Polísia Japaun, liuhosi INTERPOL, no Prokuradoria-Jerál Japaun, mós fahe informasaun no esperiénsia kona-ba krime sibernétiku, inklui métodu investigasaun, prevensaun no dezafiu sira iha kombate krime sira ne’ebé komete liuhosi sistema no plataforma dijitál.

Diskusaun ne’e mós partisipa hosi reprezentante sira hosi Defensoria Públika, PNTL, Polícia Científica de Investigação Criminal (PCIC), Unidade Inteligénsia Finanseira (UIF) – Banco Central de Timor-Leste, TIC, Universidade Nasionál Timor Lorosa’e (UNTL), sosiedade sivíl, no jurista sira hosi DGPJ.