𝗗Í𝗟𝗜, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮, 𝟮𝟰 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, hamutuk ho Diretór Ezekutivu Komersiál Empresa Thales, Raymond Law, hala’o asinatura ba kontratu kona-ba fornesimentu Kaderneta Pasaporte Eletróniku Foun hamutuk 76.920 unidade ba Repúblika Demokrátika Timor-Leste (RDTL), iha Sala Ministériu Justisa, Kolmera, Díli.

Iha nia diskursu, Ministru Justisa hateten, serimónia asinatura kontratu ne’e realiza ho satisfasaun no responsabilidade institusionál, tanba reprezenta kompromisu no kontinuidade husi Ministériu Justisa no Governu Timor-Leste hodi asegura disponibilidade dokumentu viajen ne’ebé seguru, modernu no tuir padraun internasionál.

“Serimónia ne’ebé ita realiza ohin la’ós de’it atu reprezenta aktu administrativu ka formalidade ida. Ne’e simboliza, liuliu, kompromisu no kontinuidade husi Ministériu Justisa no Governu Timor-Leste ba seguransa nasionál, soberania Estadu nian, no mós atu garante direitu fundamentál sidadaun sira nian utiliza ho dignidade no seguransa iha kontestu internasionál,” dehan Ministru Justisa.

Ministru Justisa subliña katak pasaporte Timor-Leste nu’udar dokumentu importante ida ne’ebé reprezenta soberania Estadu nian iha rai li’ur. Tanba ne’e, desde introdusaun Pasaporte Eletróniku, Timor-Leste kontinua kompromete-an atu adota no kumpre padraun internasionál, inklui exigénsia sira husi Organizasaun Aviasaun Sivil Internasionál (ICAO).

“Ita hakarak garante katak Timor-oan ida-idak, bainhira viajen, lori dokumentu ne’ebé seguru, modernu, labele falsifika no bele rekoñese iha aeroportu no pontu fronteira internasionál sira,” hateten Ministru.

Ministru Justisa mós konta, parseria entre Ministériu Justisa no Empresa Thales komesa ona iha tinan 2017, liuhosi asinatura kontratu ba fornesimentu lote primeiru kaderneta pasaporte eletróniku hamutuk 150.000 unidade. Durante tinan sira ne’e, kooperasaun ne’e kontribui ba garantia disponibilidade dokumentu identifikasaun no viajen ba populasaun, no mós suporta kontinuidade prestasaun servisu públiku ne’ebé esensiál.

Akizisaun kaderneta pasaporte eletróniku foun hamutuk 76.920 unidade ne’e tama iha estratéjia planeamentu no jestaun preventiva husi Ministériu Justisa, atu evita falta ka interrupsaun stock no asegura katak Diresaun-Jerál Servisu Rejistu no Notariadu iha matéria-prima ne’ebé sufisiente atu responde ba nesesidade sidadaun sira, tantu iha rai-laran, nune’e mós liuhosi rede konsulár Timor-Leste iha estranjeiru.

Ministru Justisa mós hato’o apelu ba reprezentante Empresa Thales atu garante kumprimentu prazu no manutensaun padraun teknolojia no seguransa aas, tuir kondisaun kontratual sira.

“Rígór iha prosesu emisaun no kualidade materiál pasaporte nian mak imperativu seguransa nasionál ida ne’ebé ita labele husik,” subliña Ministru Justisa.

Iha oportunidade ne’ebá, Ministru Justisa hato’o mós agradesimentu ba funsionáriu no servidór públiku sira iha Ministériu Justisa, liuliu Servisu Rejistu no Notariadu, ba sira-nia esforsu no dedikasaun loron-loron iha prestasaun servisu ba sidadaun sira.

Ministru Justisa afirma katak Ministériu sei kontinua hala’o esforsu atu moderniza servisu públiku, hodi halo servisu sira sai efisiente liután, lalais liután no asesível ba sidadaun hotu.

Iha parte seluk, Diretór Ezekutivu Komersiál Empresa Thales, Sr. Raymond Law, reafirma kompromisu Empresa Thales atu kontinua servisu hamutuk ho Ministériu Justisa Timor-Leste iha área dokumentu viajen, liuliu iha dezenvolvimentu no introdusaun dezeñu pasaporte foun ba sidadaun Timor-Leste.

Raymond Law hato’o nia agradesimentu ba Governu Timor-Leste, liuliu Ministériu Justisa, tanba kontinua fó konfiansa ba Empresa Thales durante tinan 10 liubá.

“Ne’e onra ba Thales atu servisu hamutuk ho Ministériu Justisa no apoia emisaun pasaporte seguru ba sidadaun Timor-Leste,” dehan Raymond Law.

Nia mós afirma katak projetu foun ne’e sei lori dezeñu pasaporte foun ne’ebé reflete kompromisu hamutuk ho Governu Timor-Leste atu hametin seguransa no integridade dokumentu viajen ba sidadaun Timoroan sira.

Parseria entre Empresa Thales no Ministériu Justisa ne’e marka ona tinan 10, no projetu foun kona-ba fornesimentu kardeneta pasaporte eletróniku konsidera nu’udar kontinuidade husi kooperasaun entre parte rua iha apoiu ba seguransa, modernizasaun no fortalese dokumentu ofisiál Timor-Leste.

Iha serimónia asinatura kontratu ne’e, partisipa mós Reprezentante Empresa Thales DIS Singapore PTE LTD, Winston Yeo Ping Wei; Diretór Ezekutivu Komersiál Empresa Thales, Raymond Law; Diretór-Jerál Servisu Rejistu no Notariadu, Dr. Agostinho Gonçalves Vieira; Diretór-Jerál Polítika Justisa, Dr. Nelinho Vital; no dirijente sira no funsionáriu sira iha ámbitu Ministériu Justisa.